पार्वतीप्रोक्तं रौद्रनामेन शिवस्तुतिः
(शिवगौरीसंवादे)
श्रीपार्वती -
चण्डांशुशीतांशुहुताशनेत्रं चक्षुःश्रवापारविलोलहारम् ।
चर्माम्बरं चन्द्रकलावतंसं चराचरस्थं चतुराननेड्यम् ॥ १५३॥
विश्वाधिकं विश्वविधानदक्षं विश्वेश्वरं विश्रुतनामसारम् ।
विनायकेड्यं विधिविष्णुपूज्यं विभुं विरूपाक्षमजं भजेऽहम् ॥ १५४॥
मधुमथनाक्षिवराब्जपूज्यपादं मनसिजतनुनाशनोत्थदीप्तमन्युम् ।
मम मानसपद्मसद्मसंस्थं मतिदाने निपुणं भजामि शम्भुम् ॥ १५५॥
हरिं हरन्तमनुयन्ति देवा नखैस्तथा पक्षवातैः सुघोणैः ।
नृसिंहमुग्रं शरभाकृतिं शिवं मत्तं तदा दानवरक्तपानात् ॥ १५६॥
नखरमुखरघातैस्तीक्ष्णया दंष्ट्रयापि
ज्वरपरिकरदेहे नाश्चतापैः सुदीप्ते ।
दितिजकदनमत्तं संहरन्तं जगच्च
हरिमसुरकुलघ्नं देवतुष्ट्यै महेशः ।
परशुवरनिखातैः क्रोडमुन्क्रोष्टुमीष्टे ॥ १५७॥
- -
रौद्रनामभिरीशानं स्तुत्वाऽथ जगदम्बिका ।
प्रेमाश्रुपुलका देवं सा गाढं परिषस्वजे ॥ १५८॥
शौनकः -
कानि रौद्राणि नामानि त्वं नो वद विशेषतः ।
न तृप्तिरीशचरितं श्रृण्वतां नः प्रसीद भो ॥ १५९॥
सूतः -
तान्यहं वो वदाम्यद्य श्रृणुष्वं शौनकादयः ।
पवित्राणि विचित्राणि देव्या प्रोक्तानि सत्तमाः ॥ १६०॥
- -
देवी -
दिशाम्पतिः पशुपतिः पथीनां पतिरीश्वरः ।
अन्नानां च पतिः शम्भुः पुष्टानां च पतिः शिवः ॥ १६१॥
जगतां च पतिः सोमः क्षेत्राणां च पतिर्हरः ।
वनानां पतिरीशानो वृक्षाणां च पतिर्भवः ॥ १६२॥
आव्याधिनीनां च पतिः स्नायूनां च पतिर्गुरुः ।
पत्तीनां च पतिस्ताभ्रः सत्वनां च पतिर्भवः ॥ १६३॥
आरण्यानां पतिः शम्भुर्मुष्णतां पतिरुष्णगुः ।
प्रकृतीनां पतिश्चेशः कुलुञ्चानां पतिः समः ॥ १६४॥
रुद्रो गृत्सपतिर्व्रात्यो भगीरथपतिः शुभः ।
अन्धसाम्पतिरीशानः सभायाः पतिरीश्वरः ॥ १६५॥
सेनापतिश्च श्वपतिः सर्वाधिपतये नमः ।
प्रणता विनता तवाङ्घ्रिपद्मे भगवन्परिपाहि मां विभो त्वम् ।
तव कारुण्यकटाक्षलेशलेशैर्मुदिता शङ्कर भर्ग देवदेव ॥ १६६॥
॥ इति शिवरहस्यान्तर्गते भर्गाख्ये पञ्चमांशे शिवगौरीसंवादे
पार्वतीप्रोक्तं रौद्रनामेन शिवस्तुतिः सम्पूर्णा ॥
- ॥ श्रीशिवरहस्यम् । भर्गाख्यः पञ्चमांशः । अध्यायः ४०। १५३-१६६॥
- .. shrIshivarahasyam . bhargAkhyaH panchamAMshaH . adhyAyaH 40. 153-166..
Notes-
Parvati recites Shiva Stuti composed of
various names of Rudra.