यमकृता शिवस्तुतिः
शिव हर भव भर्ग भीम शम्भो
त्रिणयन शङ्कर शर्व चन्द्रमौले ।
भव शरणमितीरयन्ति ये तान्
भजत मुहुर्विनयेन पूजयध्वम् ॥ २०२॥
पुरहर सुरनाथ मन्मथारे
हरिनयनाम्बुजपूजिताङ्घ्रिपद्म ।
भवशरणमितीरयन्ति ये तान्
भजत मुहुर्विनयेन पूजयध्वम् ॥ २०३॥
निरवधिकरुणासुधैकसिन्धो
गिरिश गिरीश महेश पार्वतीश ।
भव शरणमितीरयन्ति ये तान्
भजत मुहुर्विनयेन पूजयध्वम् ॥ २०४॥
धृतभसितभुजगराजहार
प्रियहरिवल्लभ दिव्यनीलकण्ठ ।
भव शरणमितीरयन्ति ये तान्
भजत मुहुर्विनयेन पूजयध्वम् ॥ २०५॥
विनिहतनरसिह्मचण्डगर्व
स्फुरदुरुकन्धरकन्धराग्निमूर्ते ।
भव शरणमितीरयन्ति ये तान्
भजत मुहुर्विनयेन पूजयध्वम् ॥ २०६॥
विनिहतविधिमुण्डमुण्डमाला-
कलन कराल लोलशूलपाणे ।
भव शरणमितीरयन्ति ये तान्
भजत मुहुर्विनयेन पूजयध्वम् ॥ २०७॥
विविधविभव वेदगीतकीर्ते
श्रुति विहित विनोदिताष्टमूर्ते ।
भव शरणमितीरयन्ति ये तान्
भजत मुहुर्विनयेन पूजयध्वम् ॥ २०८॥
शरणद शिपिविष्ट कालकाल
त्रिदशवरामरसेवितङ्घ्रिपीठ ।
भव शरणमितीरयन्ति ये तान्
भजत मुहुर्विनयेन पूजयध्वम् ॥ २०९॥
॥ इति शिवरहस्यान्तर्गते यमकृता शिवस्तुतिः सम्पूर्णा ॥
- ॥ श्रीशिवरहस्यम् उग्राख्यः सप्तमांशः । अध्यायः १७ । २०२-२०९॥
- .. shrIshivarahasyam ugrAkhyaH saptamAMshaH . adhyAyaH 17 . 202-209 ..
Encoded and proofread by Ruma Dewan