शिवविद्या एवं शिवदीक्षा महिमा
शिवदीक्षाप्रभावस्तु शिवेन ज्ञायते परः ।
यद्यप्यथापि तद्रूपं शृणु सादरमस्ति कः ॥ १॥
शिवमन्त्रे दीक्षितस्य तनुं दृष्ट्वाऽपि दूरतः ।
प्रयान्ति यमदूतास्तु तथा पातकपर्वताः ॥ २॥
अधुनैव त्वया दृष्टः पापाकारो गजो महान् ।
महापर्वतसङ्काशो ज्वलत्यद्यापि पश्य तम् ॥ ३॥
पापानि गजरूपेण निर्गतानि तवाधुना ।
मत्भालभूतिसङ्गेन मदङ्गालोकनादपि ॥ ४॥
दीक्षितः शैवविद्यायां बाल्ये भाग्यवशादहम् ।
श्रीकालकालकरुणां सम्पूर्णा मयि तिष्ठति ॥ ५॥
ये ये शाम्भाविद्यायां दीक्षितास्ते तपोधनाः ।
तत्पादरजला तावत् पावनं भुवनत्रयम् ॥ ६॥
यस्य शाम्भवविद्यायां भक्तिर्भवति भाग्यतः ।
तं नमन्ति सुराः सर्वे शर्वानुग्रहकाङ्क्षया ॥ ७॥
अक्षयं धनमस्माकं सा विद्या शाम्भवी खलु ।
अन्यत् धनं क्षयं याति न तद्याति क्षयं (नृप) ॥ ८॥
बहुपुण्याब्धयः शैवाः तां दीक्षां प्राप्य सादरम् ।
दृष्ट्वा भवन्ति ते तावत् द्वित्रा एव कलौ खलु ॥ ९॥
न यस्य पातकाद्भीतिः न यमादपि जायते ।
तस्य पुण्यस्वरूपस्य विद्या भवति शाम्भवी ॥ १०॥
कैलासमपि सम्प्राप्ताः शैवाः शाम्भवविद्यया ।
सोपानरूपा विद्येयं कैलासारोहणोद्यमा ॥ ११॥
नान्यैरुपायैस्तल्लाभः कैलासो दुर्लभोऽप्ययम् ।
सुलभत्वेन विज्ञेयस्तया शाम्भवविद्यया ॥ १२॥
न यस्य शाम्भवी विद्या तस्य जन्म निरर्थकम् ।
वन्ध्या तज्जननी (राजन्) तेन पुत्रेण कि फलम् ॥ १३॥
मानुषं जन्म सम्प्राप्य द्विजत्वं च विशेषतः ।
सम्प्राप्य शाम्भवीं विद्यां राजते द्विजराजवत् ॥ १४॥
तृप्ता भवन्ति पितरः तया शाम्भवविद्यया ।
तद्विद्यासहितं विषं प्रणमन्ति मुनीश्वराः ॥ १५॥
ब्राह्मणः शाम्भवीं विद्यां यावन्नाप्नोति पुण्यदाम् ।
तावन्न स प्रणामार्हो न दानार्होऽपि (भूपते) ॥ १६॥
अभ्यस्य शाम्भवीं विद्यां शिवार्चनरतो यदि ।
तदैव स्यात् प्रणामार्हो दानार्होऽपीति मन्महे ॥ १७॥
परमा शाम्भवी विद्या दुर्लभा परमार्थतः ।
अतस्तत्राधिकारोऽपि दुर्लभत्वेन निश्चितः ॥ १८॥
सम्प्राप्य शाम्भवीं विद्यां शम्भुपूजां करोति चेत् ।
तदा शिवेन सा पूजा गृह्यते प्रीतिपूर्वकम् ॥ १९॥
तथैव विद्यया दत्तं शिवलिङ्गे जलादिकम् ।
सुधात्वं याति तेनैव मुक्तास्तत्पितरोऽपि हि ॥ २०॥
॥ इति शिवरहस्यान्तर्गते शिवविद्या एवं शिवदीक्षा महिमा सम्पूर्णा ॥
- ॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः २३। ५-२४ ॥
- .. shrIshivarahasyam . harAkhyaH tRRitIyAMshaH . pUrvArdham . adhyAyaH 23. 5-24 ..
Proofread by Ruma Dewan