श्री सिद्धलिङ्गाष्टकम्
-श्री एम. जि. नञ्जुण्डाराध्यविरचितं
आत्मानात्मविवेकपूर्णकुशलं विद्यावधूवल्लभं
पञ्चाचारविचार षट्स्थलसुधास्वादैकवेद्यं विभुम् ।
व्योमातीत सुकीर्तियुक्तममलं भक्तेष्टसिद्धि प्रदं
वन्दे तोण्टद सिद्धलिङ्गयतिनं श्रीशैवरत्नाकरम् ॥ १॥
यं ब्रह्मेन्द्रमरुद्गणाः प्रतिदिनं ध्यायन्ति भक्त्या मुदा
वेदाद्येःप्रतिपाद्यमानविभवं तं देवदेवं शिवम् ।
योगाभ्यासबलान्नियम्य हृदये यो लोकवन्द्यो बभौ
वन्दे तोण्टद सिद्धलिङ्गयतिनं श्री शैवरत्नाकरम् ॥ २॥
सत्पत्नीतनुजाप्तमित्र विभवा नित्याः किलेति प्रभो !
भ्रान्तोऽहं निजतत्वमार्गविमुखो घूर्णामि भूमौ सदा ।
आशापाशविमोचनैकचतुरं त्वां सर्वसंरक्षकं
वन्दे तोण्टद सिद्धलिङ्गयतिनं श्रीशैवरत्नाकम् ॥ ३॥
निर्लिप्तं करुणाकरं सुखमयं शान्तं महोत्साहिनं
भक्ताधीनसुमङ्गलाङ्गविभवं चिल्लिङ्गलोलं गुरुम् ।
वेदान्तागमशास्त्रविदमणिं सत्यव्रतं स्वामिनं
वन्दे तोण्टद सिद्धलिङ्गयतिनं श्रीशैवरत्नाकरम् ॥ ४॥
लब्ध्वापुण्यलवं शिवस्य कृपया प्राप्य स्वरूपश्रियं
मूकान्धादिविकारजालसरणिं यावत्तु न प्राप्नुयाम् ।
तावत्वां सुरसेवितं सुखकरं संसारशैलाशनिं
वन्दे तोण्टद सिद्धलिङ्गयतिनं श्रीशैवरत्नाकरम् ॥ ५॥
विद्युल्लोलविलोभकारिविषयव्यासक्त चित्तस्सदा
कामक्रोधनिबद्धमूर्तिरनिशं ताम्यामि भूमौ विभो ! ।
मोहाम्भोनिधितारकं यतिनुतं सुज्ञानदानाग्रणीं
वन्दे श्रीगुरु सिद्धलिङ्गयतिनं श्रीशैवरत्नाकरम् ॥ ६॥
मोहध्वान्तविभेदकं शिवरतिज्योत्सनासुधासेचकं
पुण्यारण्यचरैक दिव्यशिखिनं कैवल्यकल्पद्रुमम् ।
संसारार्णवमग्नलोकतरणिं भव्यात्मसंशोभितं
वन्दे तोण्टद सिद्धलिङ्गयतिनं श्रीशैवरत्नाकरम् ॥ ७॥
आनन्दाम्बुधिचन्द्र बन्धुर कृपामन्दार सत्याश्रय
नानायोगिवरेण्यवन्दित लसत्पादाब्ज विद्योतित ।
भानुज्योतिरतीतकान्तिमहिमः श्रीसिद्धलिङ्गप्रभो !
त्वां वन्दे भवमोचनायसुगुरो ! मां रक्ष रक्षाधुना ॥ ८॥
सिद्धलिङ्गाष्टकं लोके यः पठेच्छृणुयादपि
विमुच्यकिल्बिषैस्सर्वैशिवप्रीतिमवाप्नुयात् ।
अमरोक्ताष्टकं चेदं जीयादाचन्द्रतारकम्
भक्तेष्टार्थप्रदो देवो सिद्धलिङ्गो विराजतम् ॥
इति अमरवाण्यभिध नञ्जुण्डाराध्यविरचितं सिद्धलिङ्गाष्टकं सम्पूर्णम् ।
Proofread by Vani V.