श्रीसिद्धलिङ्गमहाशिवयोगिसुप्रभातम्
(पण्डित श्री बसवराजशास्त्रिविरचितम्)
श्री सिद्धलिङ्गेश महेश शम्भो चोत्तिष्ठ योगीश महाप्रकाश ।
शान्तेश दान्तेश भवाशु देव लोकानुरोधेन बहिर्मुखो हि ॥ १॥
उत्तिष्ठ निर्माय निरञ्जनेश निर्द्वन्द्व निस्तन्द्र निरस्तक्लेश ।
निर्भाव निश्चिन्त निराकुळालं निर्मोह नैर्गुण्य निरावलम्ब ॥ २॥
निवास गुल्मेषु पतित्रिराव मयूरवाणीकलहंसनादैः ।
प्रशान्तवातेन सुतोषदायी प्रभातमाविर्भवतीह काले ॥ ३॥
देवालये वाद्यनिनादघोषः दशाङ्ग धूपात्त सुगन्धवासः ।
कर्पूर नीराजन दीपकान्तिः घण्टारवस्तैर्जनताप्रबुद्धा ॥ ४॥
शरीरधर्मेण सुषुप्तिनाम्मा निर्लिप्तदेवेश समाधिवास ।
समाधिकार्यं तवनैजमेव तत्त्वस्वरूपस्य महामहिम्नः ॥ ५॥
तथापि लोकोद्धरणाय शम्भो समाधिकार्याद्विमुखो भवाशु ।
त्वत्पादपद्मं परिद्रष्टुकामाः ब्रह्मादिदेवाः समुपागता हि ॥ ६॥
सिद्धा मुनीन्द्राः प्रमथाश्च रुद्राः यक्षाधिपा दानवमानवाश्च ।
बालाश्चवृद्धाः प्रमदास्सुशीलाः त्वत्पादसेवामभिकाङ्क्षमाणाः ॥ ७॥
भक्तानुरागिन् भवतापहारिन् लिङ्गानुसङ्गिन् विषयेविरागिन्
कैवल्यदायिन् परमावतारिन् कन्दर्पनाशिन् शिवयोगतोषिन् ॥ ८॥
अनन्तजन्मार्जित पुण्यशेषैर्मानुष्यदेहं परिगृह्यजातान् ।
त्वत्पादसङ्गेन विशुद्ध देहान् भक्त्यासदाचारपरान् विधातुम् ॥ ९॥
देहत्रये वै वरलिङ्गसङ्गं कर्तुं नितान्तं स्थलषट्क बोधम् ।
अङ्गीयधर्मान् परिलीयलिङ्गे लिङ्गीयधर्मार्जन बोधनाय ॥ १०॥
लिङ्गाङ्गसम्बन्धविबोधनार्थं कृपां कुरुष्वाशु दयानिधे त्वम् ।
नैजं समाधिं परिमुच्ययोगिन् वाक्यामृतेनाशु विबोधयैतान् ॥ ११॥
त्वद्वक्त्र पद्मात्प्रसृतां संवाणीं संसारतप्तेषु सुधां क्षरन्तीम् ।
जन्मान्तरीयाद्बहु पुण्यशेषाल्लभ्यां निकामं परिश्रोतु मायन् ॥ १२॥
सौख्येन लिङ्गाङ्ग सुसामरस्य सम्पादनेमूलनिदानभूतम् ।
संसारतापाद्विनिवर्तमानं स्वात्माङ्गमष्टावरणं प्रवक्तुम् ॥ १३॥
वैचित्र्ययुक्तं किल विश्वमेतद् व्यक्तं कथं स्यद्विविधाङ्गरूपैः ।
सच्चित्स्वरूपं कथमेति चान्ते तन्मार्गबोधाय त्वरस्वदेव ॥ १४॥
सच्चित्स्वरूपं परिपूर्णनित्यं तत्त्वं स्वशक्त्याश्चलनेन भिन्नम् ।
विश्वस्वरूपं कथमेति सर्वं वक्तुं स्वकार्याद्विरतो भवाशु ॥ १५॥
श्रीसिद्धलिङ्गे सदयान्तरङ्गे सद्भक्तिभावेन विवर्तमानः ।
प्रभातकाले पठते य एनं प्राप्नोति सौख्यं सुतसम्पदादिम् ॥ १६॥
श्रीमन्निरञ्जन जगद्गुरु सार्वभौम
श्री सिद्धलिङ्गयतिराट् परतत्वरूप ।
चन्द्रार्कवह्नि नयनाऽमरवृन्दवन्द्य
संरक्ष भो बसवराजबुधं मुदैव ॥ १७॥
श्रीरायचूरु वरमण्डल मध्यदेशे ।
श्रीसिन्धनूरिति विभाग शिरोमणौ च ।
शोभान्विते पगडदिन्नि सुनामग्रामे ।
मेधायुतो बसवराज सुधीः कवीन्द्रः ॥ १८॥
मुक्तकं
पायाच्छ्रीमदनादि भक्तबसव स्वान्ताम्बुजान्ते स्फुर-
द्धंसो योगिमनोनिशान्त विमलज्ञान प्रदीपो विभुः ॥
भक्तादिस्थलषट्कनिर्णयपथं संस्थापयन् भूतले ।
सिद्धेशः करुणामयः परतर श्री तोण्टदार्याह्वयः ॥
इति श्रीबसवराजशास्त्रिविरचितं श्रीमदविरळपरञ्ज्योति-
जगद्गुरु-सार्वभौम-एडेयूर-तोण्टद श्रीसिद्धलिङ्गमहाशिवयोगिनां
सुप्रभातं सम्पूर्णम् ।
Proofread by Vani V.