स्कन्दकृता शिवस्तुतिः
देवदेव जगन्नाथ देवदेवोत्तम प्रभो ।
वेदवेदान्तवेद्येश जगज्जन्मैककारण ॥ २०४॥
निरामय निराधार निर्द्वन्द्व निरुपाधिक ।
निष्कलङ्क निराकार विकाररहितानघ ॥ २०५॥
महादेवामराधीश वृषाङ्क वृषवाहन ।
वृषभध्वज विघ्नेश त्रिपुरान्तक शङ्कर ॥ २०६॥
कालकाल कृपासिन्धो शितिकण्ठ शिवाप्रिय ।
त्रिकाग्निकाल कालात्मन् कालाधार प्रवर्तक ॥ २०७॥
मनोन्मनामलानन्त व्योमकेश जगत्पते ।
भूतेश भूतसङ्घात्मन् भूतैकनिलयामल ॥ २०८॥
विभूतिभूषण श्रीमन् भस्मोद्धूलितविग्रह ।
कैलासशिखरावास कृत्तिवास महेश्वर ॥ २०९॥
कपालमालाभरण जरामरणवर्जित ।
योगिवृन्दैकमन्दार वृन्दारकगणार्चित ॥ २१०॥
योगिहृत्पङ्कजारूढनिरूढनिजविग्रह ।
गण्डमण्डलविभ्राजन्मणिकुण्डमण्डित ॥ २११॥
अनन्त चण्डमार्ताण्डमण्डलाधिकसुप्रभ ।
हिरण्यबाहो विश्वात्मन् संसारार्णवतारक ॥ २१२॥
विश्वतोमुख सामात्मन् विश्वतश्चरणाजर ।
विश्वतोलोचनानन्त व्योमकेश सदाशिव ॥ २१३॥
ज्येष्ठ श्रेष्ठ समस्तात्मन् व्यापकानन्तविग्रह ।
त्रिशूलपाणे खट्वाङ्गिन् निःसङ्ग निगमाव्यय ॥ २१४॥
निराश्रयाखिलाधार परब्रह्ममयाव्यय ।
ब्रह्मानन्दैकनिलय मयस्कर निरीश्वर ॥ २१५॥
सत्त्वप्रधान सत्त्वात्मन्नानन्दमय सर्वग ।
महाश्मशाननिलय महाप्रेतासनस्थिर ॥ २१६॥
पिनाकपाणेऽदुष्टात्मन् शिष्टलोकैकजीवन ।
शार्दूलचर्मवसन भूधरेशशरासन ॥ २१७॥
स्वेच्छाकृतावनीधाज(चक्र) दग्धत्रिपुरकानन ।
वासीकृतानन्दवन सोमसूर्याग्निलोचन ॥ २१ ८॥
मुनिचित्तासनासीन कालकूटविषादन ।
कन्दर्पदर्पदमन वृषाधीशैकवाहन ॥ २१९॥
दुष्टारिसङ्घशमन दुर्लङ्घ्यदृढशासन ।
अप्रधृष्यातिरोक्ष्या(ह्या)च्छतेजःपुञ्ज निरञ्जन ॥ २२०॥
महोदर महावीर महाशूर सुरेश्वर ।
महाधाराद्भुताकार सर्वंलोकप्रभाकर ॥ २२१॥
नमस्ते नमस्ते महादेव शम्भो नमस्ते नमस्ते प्रपन्नैकबन्धो ।
नमस्ते नमस्ते दयासारसिन्धो नमस्ते नमस्ते नमस्ते महेश ॥ २२२॥
नमस्ते नमस्ते महामृत्युहारिन् नमस्ते नमस्ते महादुःखहारिन् ।
नमस्ते नमस्ते महापापहारिन् नमस्ते नमस्ते नमस्ते महेश ॥ २२३॥
नमस्ते नमस्ते सदाचन्द्रमौले नमस्ते नमस्ते सदाशूलपाणे ।
नमस्ते नमस्ते सदोमैकजाने नमस्ते नमस्ते नमस्ते महेश ॥ २२४॥
यस्य स्वरूपं न विदुः सुरासुरा यस्य स्वरूपं न विदुर्मुनीश्वराः ।
यस्य स्वरूपं न विदुर्यमेश्वरास्तस्यैव नित्यं शिवरूपमीडे ॥ २२५॥
यस्य स्वरूपं निगमैरगम्यं तस्यैव नित्यं शिवरूपमीडे ॥ २२६॥
संसारदावानलशामकाय मृत्युञ्जयायामितविक्रमाय ।
सुरासुरौघार्चितपादुकाय शिवासमेताय नमः शिवाय ॥ २२७॥
घोराऽऽधिपापौघनिवारकाय स्वर्गापवर्गादिफलप्रदाय ।
निरामयायान्धकसूदनाय शिवासमेताय नमः शिवाय ॥ २२८॥
कुन्देदुशङ्खस्फटिकोपमाय महेश्वरायाश्रितवत्सलाय ।
श्रीनीलकण्ठाय यमान्तकाय शिवासमेताय नमः शिवाय ॥ २२९॥
भुजङ्गचक्राधिपभूषणाय नानामणिभ्राजितकुण्डलाय ।
कर्पूरगौराय सुरोत्तमाय शिवासमेताय नमः शिवाय ॥ २३०॥
त्रिकाग्निकालाय मनोन्मनाय त्रियम्बकाय त्रिपुरान्तकाय ।
कालाग्निरुद्राय जगन्मयाय शिवासमेताय नमः शिवाय ॥ २३१॥
दयासमुद्राय निधीश्वराय धनेशमित्राय सुधामयाय ।
कारुण्यरूपाय मयस्कराय शिवासमेताय नमः शिवाय ॥ २३२॥
ब्रह्मेन्द्रविष्ण्वीशसुरार्चिताय देवाधिदेवाय दिगम्बराय ।
अनन्तकल्याणगुणार्णवाय शिवासमेताय नमः शिवाय ॥ २३३॥
वेदान्तवेद्याय महादयाय कैलासवासाय शिवाधवाय ।
शिवस्वरूपाय सदाशिवाय शिवासमेताय नमः शिवाय ॥ २३४॥
॥ इति शिवरहस्यान्तर्गते स्कन्दकृता शिवस्तुतिः सम्पूर्णा ॥
- ॥ श्रीशिवरहस्यम् । उग्राख्यः सप्तमांशः । अध्यायः १ । २०४-२३४॥
- .. shrIshivarahasyam . ugrAkhyaH saptamAMshaH . adhyAyaH 1 . 204-234..
Proofread by Ruma Dewan