स्कन्दप्रोक्तं शिवशरणागत्युपदेशम्
(शिवरहस्यान्तर्गते सदाशिवाख्ये)
स्कन्दः (उवाच) ।
भक्ताः सर्वे शिवं ध्यात्वा कलावेवं भवन्ति हि ।
शिवभक्तान् समुद्वीक्ष्य शिवभावानुचिन्तकान् ॥ ३२॥
नीचा अपि शिवे भक्ता भवन्त्येवं हि शैलजे ।
कर्मणा मनसा वाचा सर्वभावेन शङ्करम् ॥ ३३॥
ये प्रपन्ना महादेवं ते भवन्ति गणेश्वराः ।
चरणं करुणाम्भोधेर्मम ये शरणं गताः ॥ ३४॥
नैवाप्तजननास्तेऽमी परिच्छेद्याः कथं परैः ।
लोकानालोकयन्तोऽपि निलयाय लयं मम ॥ ३५॥
निःसीम महिमानस्ते वर्णनीयाः कथं परैः ।
स्मरन्ति च स्मरारातेः सदा पदसरोरुहम् ॥ ३६॥
मत्स्तुतौ गद्गदतरहर्षबाष्पपरिप्लुताः ।
नेत्राम्बुनिर्झरासेक पुलकाङ्कुरभूषणाः ॥ ३७॥
नादान्तरूपे हृदयाम्बुजस्थे
शिवे परञ्ज्योतिषि चिन्त्यरूपे ।
विन्यस्य चित्तं विरतान्यकामा
कामारिधामैकगता भवन्ति ॥ ३८॥
विन्यस्यतां चित्तमुमासहाये
ये भक्तमाहात्म्यमिदं महार्थम् ।
दधन्ति चित्ते सततं नरो यः
परात्परं शैवपदं प्रपद्यते ॥ ३९॥
त्रिषष्टिभक्ताः शिपिविष्टनिष्ठाः
कनिष्ठवर्णा अपि ते विशिष्टाः ।
इष्टः शिवस्याब्जपदैकभक्ति-
निष्ठा हि कष्टानपि नाशयन्ति ॥ ४०॥
संसाराब्धौ विषमविषयागाधबाधैकगर्ते
जन्मावृत्त्यैव मर्त्या मरणभयमहावात्यया शुष्कपर्णाः ।
व्यावृत्तेव प्रभवति शिवे मानवा भारतेऽस्मिन्
कामक्रोधाभिलोभोन्मदमृदितमहानक्रवक्त्रान्तराले ॥ ४४॥
नवग्रहावग्रहविग्रहार्ति-
जन्यं भयं नैव शिवेऽद्रिकन्ये ।
मामुग्रमीशं शरणं प्रपन्ना
नैवेन्द्रियग्रामपरा भवन्ति ॥ ४५॥
॥ इति शिवरहस्यान्तर्गते स्कन्दप्रोक्तं शिवशरणागत्युपदेशं सम्पूर्णम् ॥
- ॥ श्रीशिवरहस्यम् । सदाशिवाख्यः नवमांशः । अध्यायः ६५ । वावृत्तश्लोकाः ॥
- .. shrIshivarahasyam . sadAshivAkhyaH navamAMshaH . adhyAyaH 65 . vAvRRittashlokAH ..
Proofread by Ruma Dewan