श्रीताण्डवस्तोत्रम् १
नमस्कृत्य रामं महादेवदेवं
भवानीकटाक्षेक्षणानन्दजालम् ।
तदालोकलोलं महानृत्यलीलं भजे
पार्वतीशं महाताण्डवेशम् ॥ १॥
भवान्तं भजे तं हृदन्ते महान्तं
भवाब्धिं तरन्तेन्दुकुन्दावभासं
(भवाब्धेस्तरन्तीं दुकूलावभासम्) । (तरन्ती-नौका)
तमीशं रमेशार्चिताङ्घ्रि (द्वयाब्जं)
भजे पार्वतीशं महाताण्डवेशम् ॥ २॥
जटाजूटसोमं ललाटाक्षभीमं
नटाचार्यवामं सदा पूर्णकामम् ।
सदावामभामं हृदानन्दरामं
भजे पार्वतीशं महाताण्डवेशम् ॥ ३॥
धराश्रीशवागीशनागेशमुख्यैः
सुरैः सेवितं तालवीणादिहस्तैः ।
पदाघातसङ्घातसङ्घृष्टदैत्यं
भजे पार्वतीशं महाताण्डवेशम् ॥ ४॥
रणन्नूपुरद्वन्द्वहारि स्वकीयाङ्घ्रि-
पद्मद्वयाम्भोरुहापूर्णविश्वम् ।
नमन्मध्यसाचीकृतस्वाङ्घ्रिपद्मं
भजे पार्वतीशं महाताण्डवेशम् ॥ ५॥
शिवाशेषबन्धो कृपापूर्णसिन्धो
शिवानन्दसन्दोहसन्धानबन्धो ।
महाश्चर्यनृत्योल्लसत्पादपद्मं
भजे पार्वतीशं महाताण्डवेशम् ॥ ६॥
कटिप्रान्तसम्बन्धिसौवर्णसूत्रं
प्रलम्बप्रकीर्णोरुघण्टानिनादम् ।
महासिंहनादं प्रभिन्नाब्दजालं
भजे पार्वतीशं महाताण्डवेशम् ॥ ७॥
भ्रमद्बाहुदण्डं गदापूर्णरत्नं
प्रभो क्षिप्तमार्ताण्डकोटिप्रकाशम् ।
महाहीशभूषं सुरेशं महेशं
भजे पार्वतीशं महाताण्डवेशम् ॥ ८॥
महानृत्यसञ्जातभीमाट्टहासं
महायोगिहृत्पद्मकोशावभासम् ।
महानागयज्ञोपवीतावभासं
भजे पार्वतीशं महाताण्डवेशम् ॥ ९॥
भवानीश भूतेश भर्गासुरारे
भवारे पुरारे सुरेशार्चिताङ्घ्रे ।
न जानाति युष्मत्स्वरूपं जनोऽयं
भजे पार्वतीशं महाताण्डवेशम् ॥ १०॥
मुकुन्दाब्जहस्तोल्लसत्त्रासनादं (द्वेत्रनादैः)
नमद्देववृन्दं सुहृद्योगिवृन्दम् ।
लसत्कुन्ददन्तं शिवानन्दकन्दं
भजे पार्वतीशं महाताण्डवेशम् ॥ ११॥
जटाजूटगङ्गातरङ्गोर्मिचञ्च-
त्सहस्रांशु(म्बु)जातावृताकाशमीशम् ।
शरच्चन्द्रहासं सुकर्पूरभासं
भजे पार्वतीशं महाताण्डवेशम् ॥ १२॥
स्फुरन्मुद्रिकारत्नराजत्कराङ्घ्रिं
रणत्स्वर्णकोटीरराजद्भुजौघम् ।
लसन्मध्यसम्बद्धपट्टाभिरामं
भजे पार्वतीशं महाताण्डवेशम् ॥ १३॥
स्फुरन्तं नदन्तं महान्तं दिगन्तं
वसन्तं महाश्चर्यवासो नितान्तम् ।
अनन्तं भवान्तं भवानीहृदन्तं
भजे पार्वतीशं महाताण्डवेशम् ॥ १४॥
महादेव देवादिदेवेश शम्भो
भवन्तं विना देवमन्यं न जाने ।
क्षणाराधनेनाशुतोषं महेशं
भजे पार्वतीशं महाताण्डवेशम् ॥ १५॥
नमस्ते नमस्ते शिवानन्दकीर्ते
नमस्ते नमस्ते भवानन्दमूर्ते ।
नमस्ते नमस्ते शरण्यैकमूर्ते
नमस्ते नमस्ताण्डवाडम्बराय ॥ १६॥
नमस्ते नमस्ते जगज्जन्मकर्त्रे
नमस्ते नमस्ते नमः भालनेत्र ।
नमस्ते नमस्ते हरायाग(घ)हर्त्रे
नमस्ते नमस्ताण्डवाडम्बराय ॥ १७॥
नमः पार्वतीप्राणनाथाय तुभ्यं
नमः सर्वलोकैकनाथाय तुभ्यम् ।
नमो विष्णुहृत्पद्मकोशाय तुभ्यं
नमस्ते नमस्ताण्डवाडम्बराय ॥ १८॥
नमो दिव्यकैलासवासाय तुभ्यं
नमो दिव्यरत्नाहिभूषाय तुभ्यम् ।
नमः सर्वयज्ञोपवीताय तुभ्यं
नमस्ते नमस्ते नमः शङ्कराय ॥ १९॥
नमः शम्भवे टङ्कवज्राङ्किताय-
नमो भक्तलोकैकपालाय तुभ्यम् ।
इदं धूर्जटेस्ताण्डवस्तोत्रराजं
(प्रभाते)पठन्ति प्रसन्नाञ्जनेकः(न्तरङ्गाः)।
सुरेन्द्रादिभोगानिहैवास्य भुक्त्वा
तदन्ते लभन्ते शिवानन्दलोकम् ॥ २०॥
॥ इति श्रीताण्डवस्तोत्रं सम्पूर्णम् ॥
Proofread by Aruna Narayanan