Vasishthakritam Shiva Stotram

वसिष्ठकृतं शिवस्तोत्रम्

नमः शिवाय शुद्धाय सर्वगायाऽमृताय च । कपर्द्दिने नमस्तुभ्यं नमस्तस्मै त्रिमूर्त्तये ॥ ६॥ नमः स्थूलाय सूक्ष्माय व्यापकाय महात्मने । निषङ्गिणे नमस्तुभ्यं त्रिनेत्राय नमो नमः ॥ ७॥ नमश्चन्द्रकलाधार नमो दिग्वसनाय च । पिनाकपाणये तुभ्यमष्टमूर्ते नमो नमः ॥ ८॥ नमस्ते ज्ञानरूपाय ज्ञानगम्याय ते नमः । नमस्ते ज्ञानदेहाय सर्वज्ञानमयाय च ॥ ९॥ काशीपते नमस्तुभ्यं गिरिशाय नमो नमः । जगत्कारणरूपाय महादेवाय ते नमः ॥ १०॥ गौरीकान्त नमस्तुभ्यं नमस्तुभ्यं शिवात्मने । ब्रह्मविष्णुस्वरूपाय त्रिनेत्राय नमो नमः ॥ ११॥ विश्वरूपाय शुद्धाय नमस्तुभ्यं महात्मने । नमो विश्वस्वरूपाय सर्वदेवमयाय च ॥ १२॥ इति श्रीस्कन्दपुराणे प्रभासखण्डे अर्बुदखण्डे चतुर्थाध्यायान्तर्गतं वसिष्ठकृतं शिवस्तोत्रं समाप्तम् । स्कन्दपुराण । प्रभासखण्ड । अर्बुदखण्ड । अध्याय ४/६-१२॥ skandapurANa . prabhAsakhaNDa . arbudakhaNDa . adhyAya 4/6-12.. Proofread by PSA Easwaran