विष्णुकृता शिवस्तुतिः १
(शिवरहस्यान्तर्गते उग्राख्ये)
विष्णुरुवाच ।
शिव एव महादेवो देवदेवोत्तमः प्रभुः ॥ १२३.२॥
शिव एव ममाराध्यः शिव एव धनं मम ।
शिव एव मम स्वामी शिव एवं प्रभुर्मम ॥ १२४॥
शिव एव हि निक्षेपः शिव एव हि जीवनम् ।
शिव एव हि कल्याणं शिव एव हि भूषणम् ॥ १२५॥
शिव एव ममाशास्यः शिव एव परा गतिः ।
शिव एव ममाभ्यर्च्यः शिव एव ममेष्टदः ॥ १२६॥
शृणोम्यहं शिवकथां शिवमेवार्चयाम्यहम् ।
पश्यामि च जगत्सर्वं शिवरूपं चराचरम् ॥ १२७॥
सर्वपापहरं पुण्यं शिवनाम जपाम्यहम् ।
यमाहुः पार्वतीनाथं वेदास्तमहमीश्वरम् ॥ १२८॥
पूजयाम्यतियत्नेन प्रणमामि च सर्वदा ।
यमाहुः श्रीविरूपाक्षं वेदास्तमहमीश्वरम् ॥ १२९॥
पूजयाम्यतियत्नेन प्रणमामि च सर्वदा ।
यमाहुर्जगतामीशं वेदास्तमहमीश्वरम् ॥ १३०॥
पूजयाम्यतियत्नेन प्रणमामि च सर्वदा ।
यमाहुः परमेशानं वेदास्तमहमीश्वरम् ॥ १३१॥
पूजयाम्यतियत्नेन प्रणमामि च सर्वदा ।
यमाहुः शम्भुमनघं वेदास्तमहमीश्वरम् ॥ १३२॥
पूजयाम्यतियत्नेन प्रणमामि च सर्वदा ।
यमाहुस्तारकं ब्रह्म वेदास्तमहमीश्वरम् ॥ १३३॥
पूजयाम्यतियत्नेन प्रणमामि च सर्वदा ।
यमाहुस्सर्वकर्तारं वेदास्तमहमीश्वरम् ॥ १३४॥
पूजयाम्यतियत्नेन प्रणमामि च सर्वदा ।
यमाहुर्निष्प्रतिद्वन्द्वं वेदास्तमहमीश्वरम् ॥ १३५॥
पूजयाम्यतियत्नेन प्रणमामि च सर्वदा ।
यमाहुर्यज्ञफलदं वेदास्तमहमीश्वरम् ॥ १३६॥
पूजयाम्यतियत्नेन प्रणमामि च सर्वदा ।
यमाहुर्ज्ञानदातारं वेदास्तमहमीश्वरम् ॥ १३७॥
पूजयाम्यतियत्नेन प्रणमामि च सर्वदा ।
यमाहुः शिवमद्वैतं वेदास्तमहमीश्वरम् ॥ १३८॥
पूजयाम्यतियत्नेन प्रणमामि च सर्वदा ।
यमाहुर्निर्गुणं शान्तं वेदास्तमहमीश्वरम् ॥ १३९॥
पूजयाम्यतियत्नेन प्रणमामि च सर्वदा ।
यमाहुर्निष्क्रियं शुद्धं वेदास्तमहमीश्वरम् ॥ १४०॥
पूजयाम्यतियत्नेन प्रणमामि च सर्वदा ।
यमाहुर्निष्कलं नित्यं वेदास्तमहमीश्वरम् ॥ १४१॥
पूजयाम्यतियत्नेन प्रणमामि च सर्वदा ।
यमाहुर्मृत्युहन्तारं वेदास्तमहमीश्वरम् ॥ १४२॥
पूजयाम्यतियत्नेन प्रणमामि च सर्वदा । १४३.१
॥ इति शिवरहस्यान्तर्गते विष्णुकृता शिवस्तुतिः १ सम्पूर्णा ॥
- ॥ श्रीशिवरहस्यम् । उग्राख्यः सप्तमांशः । अध्यायः २२। १२३.२-१४३।१॥
- .. shrIshivarahasyam . ugrAkhyaH saptamAMshaH . adhyAyaH 22 . 123.2-143.1..
Proofread by Ruma Dewan