Vishnukritam 1 Shiva Stotram

 विष्णुकृतं १ शिवस्तोत्रम् 

विष्णुरुवाच ।
ॐ वेदवेद्याय देवाय तस्मै
शुद्धप्रभाचिन्त्यरूपाय कस्मै ।
ब्रह्माद्यधीशाय सृष्ट्यादिकर्त्रे
विष्णुप्रियायार्तिहन्त्रेऽन्तकर्त्रे ॥ ७९-३२२॥

नमस्तेऽखिलाधीश्वरायाम्बराय
नमस्ते चरस्थावरव्यापकाय ।
नमो वेदगुह्याय भक्तप्रियाय
नमः पाकभोक्त्रे मखेशाय तुभ्यम् ॥ ७९-३२३॥

नमस्ते शिवायादिदेवाय कुर्म
नमो व्यालयज्ञोपवीतप्रधर्त्रे ।
नमस्ते सुराबिन्दुवर्षापनाय
त्रयीमूर्तये कालकालाय नाथ ॥ ७९-३२४॥

धरित्रीमरुद्व्योमतोयेन्दुवह्नि-
प्रभामण्डलात्माष्टधामूर्तिधर्त्रे ।
शिवायाशिवघ्नाय वीराय भूया-
त्सदा नः प्रसन्नो जगन्नाथकेज्यः ॥ ७९-३२५॥

कलानाथभालाय आत्मा महात्मा
मनो ह्यग्रयानो निरूप्यो न वाग्भिः ।
जगज्जाड्यविध्वंसनो भुक्तिमुक्ति-
प्रदः स्तात्प्रसन्नः सदा शुद्धकीर्तिः ॥ ७९-३२६॥

यतः सम्प्रसूतं जगज्जातमीशा-
त्स्थितं येन रक्षावता भावितं च ।
लयं यास्यते यत्र वाचां विदूरे
स वै नः प्रसन्नोऽस्तु कालत्रयात्मा ॥ ७९-३२७॥

यदादिश्च मध्यं तथान्तं न केऽपि
विजानन्ति विज्ञा अपि स्वानुमानाः ।
स वै सर्वमूर्तिः सदा नो विभूत्यै
प्रसन्नोऽस्तु किं ज्ञापयामोऽत्र कृत्यम् ॥ ७९-३२८॥

इति नारदपुराणे पूर्वभागे एकोनाशीतितमाध्यायान्तर्गतं
         विष्णुकृतं शिवस्तोत्रं समाप्तम् ।

बृहन्नारदीयपुराण । पूर्वभाग । अध्याय ७९/३२२-३२८॥


bRRihannAradIyapurANa . pUrvabhAga . adhyAya 79/322-328..

Proofread by PSA Easwaran