Vibhishanakritam Rameshvara Stotram

 विभीषणकृतं रामेश्वरस्तोत्रम् 

(रामेश्वर लिङ्ग)
नमस्ते देवदेवेश भक्तानामभयप्रद ।
सर्वतः पाणिपादं ते सर्वतोऽक्षिशिरोमुखम् ॥ ४४॥

त्वं यज्ञस्त्वं वषट्कारस्त्वं चन्द्रस्त्वं प्रभाकरः ।
त्वं विष्णुस्त्वं चतुर्वक्त्रः शक्रस्त्वं परमेश्वरः ॥ ४५॥

यथा तिलगतं तैलं गूढं तिष्ठति सर्वदा ।
तथा त्वं सर्व लोकेषु गूढस्तिष्ठसि शङ्कर ॥ ४६॥

यथा काष्ठगतो वह्निः संस्थितोऽपि न लक्ष्यते ।
मूढैः सर्वत्र संस्थोऽपि तथा त्वं नैव लक्ष्यसे ॥ ४७॥

यथा दधिगतं सर्पिर्निगूढत्वेन संस्थितम् ।
चराचरेषु भूतेषु तथा त्वं देव संस्थितः ॥ ४८॥

यथा जलं धरापृष्ठात्खनन्नाप्नोति मानवः ।
तथा त्वां पूजयन्नित्यं मोक्षमाप्नोत्यसंशयम् ॥ ४९॥

तावच्च दुर्लभः स्वर्गस्तावच्छूराश्च शत्रवः ।
यावदेव न सन्तोषं त्वं करोषि शरीरिणाम् ॥ ५०॥

तावल्लक्ष्मीश्चला नॄणां तावद्रोगाः पृथग्विधाः ।
न यावद्देवदेव त्वं सन्तोषं सम्प्रयास्यसि ॥ ५१॥

तावत्पुत्रोद्भवं दुःखं तथा प्रियसमुद्भवम् ।
यावत्त्वं देव नायासि सन्तोषं देहिनामिह ॥ ५२॥

इति श्रीस्कन्दपुराणे नागरखण्डे चतुरधिकशततमाध्यायान्तर्गतं
         विभीषणकृतं रामेश्वरस्तोत्रं समाप्तम् ।

स्कन्दपुराण । नागरखण्ड । अध्याय १०४/४४-५२॥


skandapurANa . nAgarakhaNDa . adhyAya 104/44-52..

Proofread by PSA Easwaran