यमप्रोक्तः महादेवस्तवः
(शिवरहस्यान्तर्गते उग्राख्ये)
स एव मुक्तिकान्तायाः कान्त इत्युच्यते बुधैः ।
महादेवसमोदेवो न भूतो न भविष्यति ॥ ७३॥
मनुष्येषु यथाश्रेष्ठो ब्राह्मणो वेदवित्तमः ।
तथैव श्रीमहादेवो देवेषु श्रेष्ठ उच्यते ॥ ७४॥
चतुष्पदेषु गौः श्रेष्ठा यथा स्पृष्टाघनाशिनी ।
तथैव श्रीमहादेवो देवेषु श्रेष्ठ उच्यते ॥ ७५॥
सागरेषु यथा श्रेष्ठः क्षीराब्धिरिति विश्रुतः ।
तथैव श्रीमहादेवो देवेषु श्रेष्ठ उच्यते ॥ ७६॥
मुक्तिक्षेत्रेषु सर्वेषु काशी श्रेष्ठा यथा श्रुता ।
तथैव श्रीमहादेवो देवेषु श्रेष्ठ उच्यते ॥ ७७॥
यथाचलेषु सर्वेषु कैलासः श्रेष्ठ उच्यते ।
तथैव श्रीमहादेवो देवेषु श्रेष्ठ उच्यते ॥ ७८॥
शम्भुरेव कृपाम्भोधिराराध्यं दैवतं मम ।
एतादृशं महद्भाग्यं मम भूरितपः फलम् ॥ ७९॥
शाम्भवा एव सुभगाः सुभगाशम्भुभावना ।
यया भावनया साक्षान्मोक्षलक्ष्मीरवाप्यते ॥ ८०॥
अनन्यशरणा नित्यं येऽर्चयन्ति महेश्वरम् ।
तैरेव सर्वसौख्यानि प्राप्तव्यानि न संशयः ॥ ८१॥
उद्धूल्य भस्मनाङ्गानि सर्वदा विधिपूर्वकम् ।
यः शिवाराधनं कुर्या स धन्य इति गीयते ॥ ८२॥
यस्तु नित्यं प्रयत्नेन शिवस्मरणमादरात् ।
करोति भूतिपूताङ्गः स धन्य इति गीयते ॥ ८३॥
॥ इति शिवरहस्यान्तर्गते यमप्रोक्तः महादेवस्तवः सम्पूर्णः ॥
- ॥ श्रीशिवरहस्यम् । उग्राख्यः सप्तमांशः । अध्यायः २०। ७३-८३॥
- .. shrIshivarahasyam . ugrAkhyaH saptamAMshaH . adhyAyaH 20 . 73-83..
Proofread by Ruma Dewan