Shadanana Ashtakam

 षडाननाष्टकम् 
ॐ श्रीगणेशाय नमः ।
नमोऽस्तु वृन्दारकवृन्दवन्द्य-
     पादारविन्दाय सुधाकराय ।
षडाननायामितविक्रमाय
     गौरीहृदानन्दसमुद्भवाय ॥ १॥

नमोऽस्तु तुभ्यं प्रणतार्तिहन्त्रे
     कर्त्रे समस्तस्य मनोरथानाम् ।
दात्रे रतानां परतारकस्य
     हन्त्रे प्रचण्डासुरतारकस्य ॥ २॥

अमूर्तमूर्ताय सहस्रमूर्तये
     गुणाय गुण्याय परात्पराय ।
आपारपारयपारपराय
     नमोऽस्तु तुभ्यं शिखिवाहनाय ॥ ३॥

नमोऽस्तु ते ब्रह्मविदां वराय
     दिगम्बरायाम्बरसंस्थिताय ।
हिरण्यवर्णाय हिरण्यबाहवे
     नमो हिरण्याय हिरण्यरेतसे ॥ ४॥

तपःस्वरूपाय तपोधनाय
     तपःफलानां प्रतिपादकाय ।
सदाकुमाराय हि मारमारिणे
     तृणीकृतैश्वर्यविरागिणे नमः ॥ ५॥

नमोऽस्तु तुभ्यं शरजन्मने विभो
     प्रभातसूर्यारुणदन्तपङ्क्तये ।
बालाय चापारपराक्रमाय
     षाण्मातुरायालमनातुराय ॥ ६॥

मीढुष्ठमायोत्तरमीढुषे नमो
     नमो गणानां पतये गणाय ।
नमोऽस्तु ते जन्मजरादिकाय
     नमो विशाखाय सुशक्तिपाणये ॥ ७॥

सर्वस्य नाथस्य कुमारकाय
     क्रौञ्चारये तारकमारकाय ।
स्वाहेय गाङ्गेय च कार्तिकेय
     शैलेय तुभ्यं सततन्नमोऽस्तु ॥ ८॥

इति स्कान्दपुराणान्तर्गतं अगस्त्यप्रोक्तं षडाननाष्टकं सम्पूर्णम् ।

Encoded by Sivakumar Thyagarajan Iyer
Proofread by Sivakumar Thyagarajan Iyer, PSA Easwaran