Agastikritam Skanda Stotram

 अगस्तिकृतं स्कन्दस्तोत्रम् 

अगस्तिरुवाच ।
नमोऽस्तु वृन्दारकवृन्दवन्द्य पादारविन्दाय सुधाकराय ।
षडाननायामितविक्रमाय गौरीहृदानन्दसमुद्भवाय ॥ १॥

नमोऽस्तु तुभ्यं प्रणतार्तिहन्त्रे कर्त्रे समस्तस्य मनोरथानाम् ।
दात्रे रथानां परतारकस्य हन्त्रे प्रचण्डासुरतारकस्य ॥ २॥

अमूर्तमूर्ताय सहस्रमूर्तये गुणाय गुण्याय परात्पराय ।
अपारपाराय परापराय नमोऽस्तु तुभ्यं शिखिवाहनाय ॥ ३॥

नमोऽस्तु ते ब्रह्मविदांवराय दिगम्बरायाम्बरसंस्थिताय ।
हिरण्यवर्णाय हिरण्यबाहवे नमो हिरण्याय हिरण्यरेतसे ॥ ४॥

तपःस्वरूपाय तपोधनाय तपःफलानां प्रतिपादकाय ।
सदा कुमाराय हिमारमारिणे तृणीकृतैश्वर्यविरागिणे नमः ॥ ५॥

नमोऽस्तु तुभ्यं शरजन्मने विभो प्रभातसूर्यारुणदन्तपङ्क्तये ।
बालाय चाबालपराक्रमाय षाण्मातुरायालमनातुराय ॥ ६॥

मीढुष्टमायोत्तरमीढुषे नमो नमो गणानां पतये गणाय ।
नमोऽस्तु ते जन्मजरातिगाय नमो विशाखाय सुशक्तिपाणये ॥ ७॥

सर्वस्य नाथस्य कुमारकाय क्रौञ्चारये तारकमारकाय ।
स्वाहेय गाङ्गेय च कार्तिकेय शैवेय तुभ्यं सततं नमोऽस्तु ॥ ८॥

इत्थं परिष्टुत्य स कार्तिकेयं नमो नमस्त्वित्यभिभाषमाणः ।
द्विस्त्रिःपरिक्रम्य पुरो विवेश स्थितो मुनीशोपविशेति चोक्तः ॥ ९॥

इति श्रीस्कादपुराणे काशीखण्डे पूर्वार्द्धे पञ्चविंशाध्यायान्तर्गतं
         अगस्तिकृतं स्कन्दस्तोत्रं समाप्तम् ।

स्कन्दपुराण । काशीखण्ड । पूर्वखण्ड १ । अध्याय २५/१०-१७॥


skandapurANa . kAshIkhaNDa . pUrvakhaNDa 1 . adhyAya 25/10-17..

Proofread by PSA Easwaran