श्रीस्कन्दलक्ष्मीदुर्गा सुप्रभातस्तुतिः
श्रीस्कन्दगुरु भुजङ्गस्तोत्रं च shrIskandaguru bhuja~NgastotraM
श्रीमत्स्कन्दनगावास श्रीविधायक षण्मुख ।
उत्तिष्ठ करुणामूर्ते शान्तानन्दविधायक ॥ १॥
श्रीमत्स्कन्दनगावासे सर्वसत्त्वमयीश्वरि ।
उत्तिष्ठाष्टादशभुजे लक्ष्मीदुर्गे नमोऽस्तु ते ॥ २॥
ज्योतिषा महता सर्वलोकाज्ञानविनाशक ।
उत्तिष्ठ स्कन्द लोकेश प्रणवार्थोपदेशक ॥ ३॥
सर्वलोकैकमातस्त्वं शुम्भासुरनिबर्हिणि ।
उत्तिष्ठ लोकक्षेमाय लक्ष्मीदुर्गे महाद्युते ॥ ४॥
तारं ध्वजाग्रलसितो वरताम्रचूडः
ऊर्ध्वं विधाय निजमस्तकमात्तमोदः ।
त्वन्नाम कीर्तनमयं कुरुते पवित्रं
स्कन्दाचलेश गिरिजासुत सुप्रभातम् ॥ ५॥
कल्याणकारिणि कराम्बुजशोभि पाशे
कारुण्यपूर्णहृदये कमनीयकान्ते ।
कामादि वैरिहरणे कुशलेऽस्तु लक्ष्मी-
दुर्गेऽतिदीनजनपालिनि सुप्रभातम् ॥ ६॥
श्रीकन्निमारभिध सुन्दर पूतकुल्या-
तीरस्थ शाखिनिलया विविधा विहङ्गाः ।
कूजन्ति कर्णमधुरं विविधैः स्वरैस्तत्
स्कन्दाचलेश गिरिजासुत सुप्रभातम् ॥ ७॥
वामाग्रभागविलसन्महिषोत्तमाङ्गे
देव्यग्रभागपरिशोभित धर्मसिंहे ।
कारुण्यवर्षिकमनीयमुखेऽद्य लक्ष्मी-
दुर्गे नमोऽस्तु नतपालिनि सुप्रभातम् ॥ ८॥
एते त्रिशुद्धिक्ष् सहिता महिता द्विजेन्द्राः
वेदागमादिक्ष् निपुणा विदिताखिलार्थाः ।
भक्त्योच्चरन्ति मधुरं निगमस्य मन्त्रं
श्रीदण्डशोभिकर सुन्दर सुप्रभातम् ॥ ९॥
मांसं सुरामपि बलिं परिवर्जयेति
या व्याहरत् सकलजीवदयापरीता ।
सा त्वं समस्तजगतां कुरुषेऽति भद्रं
दुर्गेऽम्बिकेऽस्तु भुवनेश्वरि सुप्रभातम् ॥ १०॥
अग्रे तवाद्य मधुरस्वरकृष्टचित्ताः
तालाभिरञ्जितकरा वरगायकाश्च ।
गायन्ति ते गुणगणानितरानवाप्यान्
मध्यार्पितैककर सुन्दर सुप्रभातम् ॥ ११॥
मातस्त्वदीय पदपङ्कजभक्तिभाजां
कुर्वन्ति वज्रधरवायुमुखास्सुसेवाम् ।
वक्तुं प्रभावमखिलं तव कोनु शक्तः
दुर्गे नमोऽस्तु तव संप्रति सुप्रभातम् ॥ १२॥
तिष्ठत्यसौ च जनताश्रुपरीतनेत्राः
धृत्वा सुगन्धयुतबन्धुरपुष्पमालाः ।
ज्योतिर्निरीक्षितुमुदारपदारविन्द
स्कन्दाचलेश करुणाकर सुप्रभातम् ॥ १३॥
पुत्रं पुरा किल वियुक्तमतिप्रकोपात्
स्कन्दं निरीक्षितुमतीव समुत्सुका त्वम् ।
स्कन्दाद्रिमागतवती सहसैव लक्ष्मी-
दुर्गे नमोऽस्तु नतपालिनि सुप्रभातम् ॥ १४॥
श्रीस्कन्दाचलशोभिनं सुरनतां रम्याननं सुन्दरीं
भक्तानामभयप्रदं कलिमलध्वंसैकबद्धादराम् ।
कारुण्याम्बुनिधिं सुशक्तिसहितां सर्वार्थदानक्षमं
दुर्गालक्ष्म्यभिधां नमेम जननीं श्रीदण्डपाणिञ्च तम् ॥ १५॥
आरक्तसुन्दरनखेन्दुरुचानुलिप्तौ
मञ्जीरमञ्जुलनिनादमनोभिरामौ ।
योगीन्द्रमूर्धविनतौ सकलेष्टदौ ते
स्कन्दाचलेशचरणौ शरणं प्रपद्ये ॥ १६॥
सूर्यस्त्वदाप्तवरदीधितिरम्ब सर्वान्
लोकान् प्रबोधयितुमेष उदेति रम्यः ।
त्वञ्चापि पश्य करुणान्वितलोचनाभ्यां
दुर्गे तवाद्य चरणौ शरणं प्रपद्ये ॥ १७॥
यस्सङ्कटं गुरुमवाप्य सकृद्गुहेति
भक्त्या वदत्यनुपमं तव नाम तं हि ।
यौ रक्षतस्सपदितावरविन्दतुल्यौ
स्कन्दाचलेशचरणौ शरणं प्रपद्ये ॥ १८॥
शुम्भं निशुम्भमपि लोकहितैषिणि त्वं
हत्वा शुभं व्यरचयः करुणाम्बुराशे ।
मातस्वदीयकरुणा वचसामतीता
स्कन्दाद्रिगेऽद्य चरणौ शरणं प्रपद्ये ॥ १९॥
सृष्टिस्थितिप्रलयकारक दीनबन्धो
क्रौञ्चाद्रिभेदक विरिञ्चिमुखामरेड्य ।
भक्तेष्टदायक दशद्विभुजाक्षिशोभिन्
स्कन्दाचलेश चरणौ शरणं प्रपद्ये ॥ २०॥
मोहं व्यपोहय मतिं कुरु पावनां मे
सन्मार्गसञ्चरणलोलुपतां प्रयच्छ ।
चित्तं कुरुष्व पदपङ्कजयुग्मलग्नं
मातस्त्वाद्यचरणौ शरणं प्रपद्ये ॥ २१॥
भक्तैकवश्य परिचिन्त्य बिभेमि नाहं
भोग्या भवेद्यमपुरेऽधिकयातनेति ।
भक्त्या मुहुर्मुहुरिमौ भयहारिणौ ते
स्कन्दाचलेश चरणौ शरणं प्रपद्ये ॥ २२॥
वाचालमम्ब कुरुषे सदयेऽतिमूकं
दीनं करोषि सहसैव धनाधिनाथम् ।
अज्ञानिनं प्रतिभया सहितं करोषि
मातुस्तवाद्य चरणौ शरणं प्रपद्ये ॥ २३॥
स्कन्देति कुक्कुटयुतेति गुहेति यस्त्वां
वाचाह्वयत्यधिकभक्तियुता सकृद्वा ।
तस्मै प्रयच्छसि समीहितमर्थमाशु
स्कन्दाचलेश चरणौ शरणं प्रपद्ये ॥ २४॥
शान्तान्तरङ्गयतिवन्दितपादपद्मे
त्वामर्चयन्ति वनिता यदि भक्तिपूर्णाः ।
सौभाग्यमाप्य सकलञ्च मुदं लभन्ते
दुर्गेऽम्बिकेऽद्य चरणौ शरणं प्रपद्ये ॥ २५॥
सुरसैन्यपतेऽसुरसैन्यरिपो
करशोभितदण्डमहाण्डकर ।
खरतारकमारक तारक मे
मरणादि भयं हर वीरवर ॥ २६॥
जगतां जननीं रजनीशमुखीं
नमनीयपदां कमनीयरुचिम् ।
महिषासुरमर्दनलोलपदां
भजतां भजतां भवभीतिहराम् ॥ २७॥
अनघं जगतां जनकं धनदं
वरदं शरदिन्दुसमानमुखम् ।
वरनीरजलोचनमार्तिहरं
करदण्डधरं प्रणमामि गुहम् ॥ २८॥
अरुणां करुणालसदक्षियुगां
गुरुनाथसुतां तरुणार्कविभाम् ।
सुरराजनुतां दरहासयुतां
नमतां नमतां सकलार्थकरीम् ॥ २९॥
गिरिवासरतं गिरिजात्मभवं
हरिजारमणं हरिणाङ्कमुखम् ।
करिवक्त्रसहोदरमादरतो
दुरितक्षतये धुरि भातु महः ॥ ३०॥
पुरतः स्फुरदात्मज रम्यमुखा-
म्बुजलोचन लोलनिजाक्षियुगाम् ।
सुलभां सुखदां वरदां करदां
भज लक्ष्म्यभिधां जननीं जगताम् ॥ ३१॥
शरच्चन्द्रतुल्यं मुखं शारदाम्भो-
रुहस्पर्धिपादद्वयञ्चाक्षियुग्मम् ।
द्षित्कालदण्डोज्जवलं पाणिपद्मं
सदा मानसे भातु मे तारकारे ॥ ३२॥
कृपास्राव्यपाङ्गादृतानन्तभक्ता
दशाष्टाभिराशोभिता बाहुभिर्या ।
वरस्कन्दगिर्याश्रया सा महाभा
सदा भातु देवी मदीयान्तरङ्गे ॥ ३३॥
न रूपं मनो मोहकं नापि वाणी
मनो हारिणी स्कन्दशैलाधिवास ।
न विद्वत्वमप्यस्ति गाङ्गेय भक्तिं
मदीयामवेक्ष्य प्रसीद प्रसीद ॥ ३४॥
सदाचारलोलं मनस्सत्यवाचं
सदान्योपकारे रतत्वं महत्वम् ।
पुनर्जन्महीनत्वमाप्तुं प्रमोदं
महालक्ष्म्यभीष्टप्रदाङ्घ्री भजेऽहम् ॥ ३५॥
त्वया तुल्य एको न चास्ते न चास्ते
क्षमौदार्यशीलो महेशस्य सूनो ।
नरो मत्समो नास्ति पापैकलोभी
क्षमस्व क्षमस्व प्रभो मेऽपराधान् ॥ ३६॥
त्वमेवाम्ब माता मदीया भवान्यां
पुनर्मातरं मा कुरु स्कन्दमातः ।
क्षमस्वापराधान् महेन्द्रादिवन्द्ये
प्रसीद प्रसीदानुकम्पा गुणाढ्ये ॥ ३७॥
शान्तानन्द महायोगिन् हृदयानन्ददायक ।
स्कन्दाचलशिरश्शोभिन् कुरु सर्वस्य मङ्गलम् ॥ ३८॥
स्कन्दाद्रिशिखरावासा कामितार्थप्रदायिनी ।
लक्ष्मीदुर्गास्वरूपा सा करोतु मम मङ्गलम् ॥ ३९॥
मयूरप्रियवाहाय कुक्कुटध्वजशोभिने ।
पाणिना धृतदण्डाय बालस्कन्दाय मङ्गलम् ॥ ४०॥
अष्टादशभुजैर्युक्ता शिष्टावनधुरन्धरा ।
इष्टानिष्टविहीना सा करोतु भुवि मङ्गलम् ॥ ४१॥
अरुणाम्बुजपादाय करुणारसवार्धये ।
तरुणाय सदा तुभ्यं गुरुनाथाय मङ्गलम् ॥ ४२॥
वन्द्यमानजनाज्ञानध्वंसकारिपदाम्बुजे ।
लक्ष्मीदुर्गे कृपापाङ्गैः कुरु सर्वत्र मङ्गलम् ॥ ४३॥
इति श्रीस्कन्दलक्ष्मीदुर्गा सुप्रभातस्तुतिः
श्रीस्कन्दगुरु भुजङ्गस्तोत्रं सम्पूर्णम् ।
Encoded by Aruna Narayanan narayanan.aruna at gmail.com
Proofread by Aruna Narayanan, PSA Easwaran psaeaswaran at gmail.com