Shri Subrahmanya Shatkam

 श्रीसुब्रह्मण्यषट्कम् 
शरणागतमातुरमाधिजितं
करुणाकर कामद कामहतम् ।
शरकाननसम्भव चारुरुचे
परिपालय तारकमारक माम् ॥ १॥

         हरसारसमुद्भव हैमवती-
         करपल्लवलालित कम्रतनो ।
         मुरवैरिविरिञ्चि मुदम्बुनिधे
         परिपालय तारकमारक माम् ॥ २॥

शरदिन्दुसमानषडाननया
सरसीरुहचारुविलोचनया ।
निरुपाधिकया निजबालतया
परिपालय तारकमारक माम् ॥ ३॥

         गिरिजासुत सायकभिन्नगिरे
         सुरसिन्धुतनूज सुवर्णरुचे ।
         शिखितोकशिखावलवाहन हे
         परिपालय तारकमारक माम् ॥ ४॥

जय विप्रजनप्रिय वीर नमो
जय भक्तजनप्रिय भद्र नमो ।
जय शाख विशाख कुमार नमः
परिपालय तारकमारक माम् ॥ ५॥

         परितो भव मे पुरतो भव मे
         पथि मे भगवन् भव रक्ष गतिम् ।
         वितराशु जयं विजयं परितः
         परिपालय तारकमारक माम् ॥ ६॥

इति कुक्कुटकेतुमनुस्मरतां
पठतामपि षण्मुखषट्कमिदम् ।
भजतामपि नन्दनमिन्दुभृतो
न भयं क्वचिदस्ति शरीरभृताम् ॥ ७॥

गाङ्गेयं वह्निगर्भं शरवणजनितं ज्ञानशक्तिं कुमारं
     ब्रह्मण्यं स्कन्ददेवं गुहमचलभिदं रुदतेजःस्वरूपम् ।
सेनान्यं तारकघ्नं गजमुखसहितं कार्तिकेयं षडास्यं
     सुब्रह्मण्यं मयूरध्वजरथसहितं देवदेवं नमामि ॥ ८॥

 ॥ इति श्रीसुब्रह्मण्यषट्कं सम्पूर्णम् ॥


Proofread by Sreenivasa Rao Bhagavatula