Vandibhih Krita Skandavijayagatha

वन्दिभिः कृता स्कन्दविजयगाथा

ततश्चिन्ताकुलो दैत्यः शुश्राव कटुकाक्षरम् । सिद्धबन्दिभिरुद्घुष्टमिदं हृदयदारणम् ॥ ३९॥ अथ गाथा । जयातुलशक्तिदीधितिपिञ्जर भुजदण्डचण्डरणरभस । सुखद कुमुदकाननविकासनेन्दो कुमार जय दितिजकुलमहोदधिवडवानल ॥ ४०॥ षण्मुख मधुररवमयूररथ सुरमुकुटकोटिघट्टितचरणनखाङ्कुरमहासन । जय ललितचूडाकलापनवविमलदल- कमलकान्त दैत्यवंशदुःसहदावानल ॥ ४१॥ जय विशाख विभो जय सकललोकतारक जय देवसेनानायक । स्कन्द जय गौरीनन्दन घण्टाप्रिय प्रिय विशाख विभो धृतपताकप्रकीर्णपटल । कनकभूषण भासुरदिनकरच्छाय ॥ ४२॥ जय जनितसम्भ्रम लीलालूनाखिलाराते जय सकललोकतारक दितिजाऽसुरवरतारकान्तक । स्कन्द जय बाल सप्तवासर जय भुवनावलिशोकविनाशन ॥ ४३॥ इति मत्स्यपुराणे एकोनषष्ट्यधिकशततमाध्यायान्तर्गता वन्दिभिः कृता स्कन्दविजयगाथा समाप्ता । मत्स्यपुराण । अध्याय १५९/४०-४३॥ matsyapurANa . adhyAya 159/40-43.. Proofread by PSA Easwaran