Rishibhih Kritam 1 Vishnu Stotram

ऋषिभिः कृतं १ विष्णुस्तोत्रम्

ऋषय ऊचुः । यो वेद सर्वं भुवनं भविष्यद्यज्जायमानं च गुहानिविष्टम् । लोकत्रयं चित्रविचित्ररूपमन्ते समस्ते च यमाविवेश ॥ २४॥ यदक्षरं शाश्वतमप्रमेयं यं वेदवेद्यमृषयो वदन्ति । यमाश्रिताः स्वेप्सितमाप्नुवन्ति तद्वस्तु सत्यं शरणं व्रजामः ॥ २५॥ भूतं महाभूतजगत्प्रधानं न विन्दते योगिनो विष्णुरूपम् । तद्वक्तुमेते ऋषयोऽत्र याताः सत्यं वदस्वेह जगन्निवास ॥ २६॥ त्वमन्तरात्माऽखिलदेहभाजां त्वमेव सर्वं त्वयि सर्वमीश । तथाऽपि जानन्ति न केऽपि कुत्राप्यहो भवन्तं प्रकृतिप्रभावात् । अन्तर्बहिः सर्वत एव सन्तं विश्वात्मना सम्परिवर्तमानम् ॥ २७॥ इति ब्रह्मपुराणे षड्विंशाधिकशततमाध्यायान्तर्गतं ऋषिभिः कृतं विष्णुस्तोत्रं समाप्तम् । ब्रह्मपुराण । अध्याय १२६/२४-२७॥ brahmapurANa . adhyAya 126/24-27.. Proofread by PSA Easwaran