Rishibhih Kritam 2 Vishnu Stotram

 ऋषिभिः कृतं २ विष्णुस्तोत्रम् 

ऋषय ऊचुः ।
नमः परमकल्याण कल्याणायात्मयोगिने ।
जनार्द्दनाय देवाय श्रीधराय च वेधसे ॥ ८॥

नमः कमलकिञ्जल्कसुवर्णमुकुटाय च ।
केशवायातिसूक्ष्माय बृहन्मूर्ते नमो नमः ॥ ९॥

महात्मने वरेण्याय नमः पङ्कजनाभये ।
नमोऽस्तु मायाहरये हरये हरिवेधसे ॥ १.८४.१०॥

हिरण्यगर्भगर्भाय जगतः कारणात्मने ।
अच्युताय नमो नित्यमनन्ताय नमो नमः ॥ ११॥

नमो मायापटच्छन्न जगद्धात्रे महात्मने ।
संसारसागरोत्तार ज्ञानपोतप्रदायिने ।
अकुण्ठमतये धात्रे सर्गस्थित्यन्त कर्मणे ॥ १२॥

यथा हि वासुदेवेति प्रोक्ते नश्यति पातकम् ।
तथा विलयमभ्येतु दैत्योऽयं मेघवाहनः ॥ १३॥

यथा विष्णुः स्वभक्तेषु पापमाप्नोति संस्थितम् ।
तथा विनाशमायातु दैत्योऽयं पापकर्मकृत् ॥ १४॥

स्मृतमात्रो यथा विष्णुः सर्वं पापं व्यपोहति ।
तथा प्रणाशमभ्येतु दैत्योऽयं मेघवाहनः ॥ १५॥

भवन्तु भद्राणि समस्तदोषाः प्रयान्तु नाशं जगतोऽखिलस्य ।
अभेद्यभक्त्या परमेश्वरेशे स्मृते जगद्धातरि वासुदेवे ॥ १६॥

ये भूतले ये दिवि येऽन्तरिक्षे रसातले प्राणिगणाश्च केचित् ।
भवन्तु ते सिद्धियुता नरोत्तमाः स्मृते जगद्धातरि वासुदेवे ॥ १७॥

ये प्राणिनः कुत्रचिदत्र सन्ति ब्रह्माण्डमध्ये परतश्च केचित् ।
तेषां तु सिद्धिः परमास्त्वनिन्द्या स्तुते जगद्धातरि वासुदेवे ॥ १८॥

इति श्रीस्कन्दपुराणे प्रभासखण्डे प्रभासक्षेत्रमाहात्म्ये
चतुरशीतितमाध्यायान्तर्गतं ऋषिभिः कृतं विष्णुस्तोत्रं
समाप्तम् ।

स्कन्दपुराण । प्रभासखण्ड । अध्याय ८४/८-१८॥


skandapurANa . prabhAsakhaNDa . adhyAya 84/8-18..

Proofread by PSA Easwaran