Andhakakritam Vishnu Stotram

 अन्धककृतं विष्णुस्तोत्रम् 

अन्धक उवाच ।
जय कृष्णाय हरये विष्णवे जिष्णवे नमः ।
हृषीकेश जगद्धात्रे अच्युताय महात्मने ॥ १५॥

नमः पङ्कजनाभाय नमः पङ्कजमालिने ।
जनार्दनाय श्रीशाय श्रीपते पीतवाससे ॥ १६॥

गोविन्दाय नमो नित्यं नमो जलधिशायिने ।
नमः करालवक्त्राय नरसिंहाय नादिने ॥ १७॥

शार्ङ्गिणे सितवर्णाय शङ्खचक्रगदाभृते ।
नमो वामनरूपाय यज्ञरूपाय ते नमः ॥ १८॥

नमो वराहरूपाय क्रान्तलोकत्रयाय च ।
व्याप्ताशेषदिगन्ताय केशवाय नमो नमः ॥ १९॥

वासुदेव नमस्तुभ्यं नमः कैटभनाशिने ।
लक्ष्म्यालय सुरश्रेष्ठ नमस्ते सुरनायक ॥ २०॥

विष्णोर्देवाधिदेवस्य प्रणामं येऽपि कुर्वते ।
प्रजापतेर्जगद्धातुस्तेषामपि नमाम्यहम् ॥ २१॥

समस्तभूतदेवस्य वासुदेवस्य धीमतः ।
प्रणामं ये प्रकुर्वन्ति तेषामपि नमाम्यहम् ॥ २२॥

तस्य यज्ञवराहस्य विष्णोरमिततेजसः ।
प्रणामं ये प्रकुर्वन्ति तेषामपि नमाम्यहम् ॥ २३॥

गुणानां हि निधानाय नमस्तेऽस्तु पुनःपुनः ।
कारुण्याम्बुनिधे देव सर्वभक्तिप्रियाय च ॥ २४॥

इति श्रीस्कन्दपुराणे आवन्त्यखण्डे रेवाखण्डे अष्टचत्वारिंशा- ध्यायान्तर्गतं
         अन्धककृतं विष्णुस्तोत्रं समाप्तम् ।

स्कन्दपुराण । आवन्त्यखण्ड । रेवाखण्ड । अध्याय ४८/१५-२४॥


skandapurANa . AvantyakhaNDa . revAkhaNDa . adhyAya 48/15-24..

Proofread by PSA Easwaran