Arjunakritam 3 Shri Krishna Stotram

अर्जुनकृतं ३ श्रीकृष्णस्तोत्रम्

विश्वकर्मन्नमस्तेऽस्तु विश्वात्मन्विश्वसम्भव । यथाहं त्वा विजानामि यथा चाहं भवन्मनाः ॥ ८॥ त्वत्तेजःसम्भवो नित्यं हुताशो मधुसूदन । रतिः क्रीडामयी तुभ्यं माया ते रोदसी विभो ॥ ९॥ त्वयि सर्वमिदं विश्वं यदिदं स्थाणुजङ्गमम् । त्वं हि सर्वं विकुरुषे भूतग्रामं सनातनम् ॥ १०॥ पृथिवीं चान्तरिक्षं च तथा स्थावरजङ्गमम् । हसितं तेऽमला ज्योत्स्ना ऋतवश्चेन्द्रियान्वयाः ॥ ११॥ प्राणो वायुः सततगः क्रोधो मृत्युः सनातनः । प्रसादे चापि पद्मा श्रीर्नित्यं त्वयि महामते ॥ १२॥ रतिस्तुष्टिर्धृतिः क्षान्तिस्त्वयि चेदं चराचरम् । त्वमेवेह युगान्तेषु निधनं प्रोच्यसेऽनघ ॥ १३॥ सुदीर्घेणापि कालेन न ते शक्या गुणा मया । आत्मा च परमो वक्तुं नमस्ते नलिनेक्षण ॥ १४॥ इति महाभारते आश्वमेधिकपर्वणि ५१ अध्यायान्तर्गतं अर्जुनकृतं श्रीकृष्णस्तोत्रम् सम्पूर्णम् । महाभारत । आश्वपर्व । अध्याय ५१/८-१४॥ mahAbhArata . Ashvaparva . adhyAya 51/8-14.. Proofread by PSA Easwaran