Balakrishnena Janebhyah Nijamantrapradanam

बालकृष्णेन जनेभ्यः निजमन्त्रप्रदानम्

``ॐ नमः श्रीकृष्णनारायणाय पतये स्वाहा'' । इतिमन्त्रं ददौ सर्वेभ्यश्च सर्वाभ्य इत्यपि ॥ ८९॥ ``शरणं श्रीकृष्णनारायणोऽस्तु मम सर्वदा'' । इत्येवं शरणं ददौ सर्वेभ्य एव सः ॥ ९०॥ ``कालमायापापकर्मशत्रुयाम्यकुहृद्भयात् । शूलमीनध्वजधनुश्चक्रस्वस्तिकवानव'' ॥ ९१॥ इत्येवं रक्षणमन्त्रं जनेभ्यः प्रददौ तदा । ``ब्रह्माऽहं श्रीकृष्णनारायणभक्तोऽस्मि शाश्वतः ॥ ९२॥ अनादिश्रीकृष्णानारायणः स्वामी पतिश्च मे'' । इत्येवं वै ब्रह्मभावमनुं ददौ च वै हरिः ॥ ९३॥ ``बालकृष्णः परब्रह्म मम वै शाश्वतः पतिः । पिता बन्धुः सुहृन्मित्रं रक्षकः पालकोऽस्तु सः'' ॥ ९४॥ आत्मनिवेदनमन्त्रं ददावेव हरिः स्वयम् । ``ॐ नमः श्रीकृष्णनारायणाय स्वामिने नमः'' ॥ ९५॥ इत्येवं श्रावयामास नमस्कारार्चनं ततः । ``श्रीश्रीकृष्णस्य भक्तोहं श्रीहरिः शरणं मम'' ॥ ९६॥ ``श्रीकृष्णवल्लभेशोऽयं श्रीस्वामी शरणं मम'' । ``श्रीकृष्णवल्लभस्वामी श्रीहरिः शरणं मम'' ॥ ९७॥ इत्येवं निजमन्त्राँश्च प्रददौ भगवान् स्वयम् । अथ प्रजा हरिं नत्वा पूजयामासुरादरात् ॥ ९८॥ इति श्रीलक्ष्मीनारायणीयसंहिता । खण्ड २। अध्याय २१९-अध्यायान्तर्गतं बालकृष्णेन जनेभ्यः निजमन्त्रप्रदानम् । लक्ष्मीनारायणीयसंहिता । खण्ड २। अध्याय २१९/८९-९८॥ lakShmInArAyaNIyasaMhitA . khaNDa 2. adhyAya 219/89-98.. Proofread by PSA Easwaran