Badarivasibhih Munibhih Kritam Shri Krishna Stotram

 बदरीवासिभिः मुनिभिः कृतं श्रीकृष्णस्तोत्रम् 

चिन्ताविष्टे जगन्नाथे रक्षामात्मनि चिन्तिते ।
तुष्टवुः पुण्डरीकाक्षं ऋषयो वीतमत्सराः ।
अर्थ्याभिर्वाग्भिरिष्टाभिरीश्वरं प्रणतास्तदा ॥ १॥

नमः प्रपन्नार्तिहरादिदेव
जगत्पते कारण कारणात्मन् ।
स्वभावशुद्धान्तपुरोधसे नमः
प्रसन्नगोविन्दगुनानुरूपिणे ॥ २॥

नमो नमो देव सनातनात्मने
नमो नमो देव जनार्दनोऽसि ।
नमो नमो माधव भक्तवत्सल
नमो नमो वामन वामनाकृते ॥ ३॥

नमः स्वभावप्रभव प्रभो हरे
जयाच्युतानन्त जगन्निवास ।
जय प्रपन्नार्तिहरामरेश
जयामरेशेश सनातनोऽसि ॥ ४॥

त्वयि प्रबुद्धे जगदादिदेव
प्रबुद्धमासीत्सकलं सदैवम् ।
सुप्तोत्थिते देव जगन्निवास
प्रबोधमयाति कथं नु लोकः ॥ ५॥

अनन्यतुल्या तव शक्तिरेषा
दुर्बोधरूपा सकलैः सुरैरपि ।
अद्यापि तां वेत्तुमनन्यचेता
ब्रह्मा समीष्टे नियतं जनार्दन ॥ ६॥

कथं वयं वेत्तुमलं जगत्पते
मग्ना हि संसारमहार्णवे हरे ।
निरूपयन्तः सततं भवन्तं
ज्ञातुं वयं देव यतामहे गुरो ॥ ७॥

तथापि सूक्ष्मं सकलेश्वरस्य
जगत्पते ते सततं नियामक ।
स्थूलं तु नित्यं जगतां निवास
तमर्चयामो वयमदिदेव ॥ ८॥

तमेव नित्यं जनकादायस्ते
भजन्ति सन्तो भगवन् यतीन्द्राः ।
तमर्चयामः सततं पुरातन
प्रभो प्रपन्नार्तिहरादिदेव ॥ ९॥

नताः स्म नित्यं जगतां निवास
भवत्पदं यत्परमं सनातनम् ।
नताः स्म गोविन्द गुणानुरूप
जगत्पते कारण कारणात्मन् ॥ १०॥

नमस्तुभ्यं नमस्तुभ्यं देव देव हरे हरे ।
नमो गोविन्द दुर्ज्ञेय योगिध्येयाङ्घ्रिपङ्कज ॥ ११॥

यत्पदं परमं नित्यं तव विष्णो हरे परम् ।
तं नमाम जगन्नाथ यत्तु पश्यन्ति योगिनः ॥ १२॥

नमो नमो हरे विष्णो नमो माधव केशव ।
यत्तु पश्यन्ति सततं योगिनो यतचेतसः ॥ १३॥

यत्प्राप्य न निवर्तन्ते तन्नमाम पदं तव ।
या माया तव गोविन्द दुर्ज्ञेया योगचिन्तकैः ॥ १४॥

तां नताः स्म जगन्नाथ यामश्रित्य स्थितिं स्थिताः ।
या रक्षति जगद्विष्णो तां नमाम हरे सदा ॥ १५॥

ऋग्यजुश्च तथा साम यं स्तौति सततं हरे ।
ऋग्यजुःसामभिर्मन्त्रैः स्तुतस्त्वं जगतीपते ॥ १६॥

द्वाभ्यां द्वाभ्यां त्रिभिश्चैव पञ्चभिश्च जनार्दन ।
पुनश्चैव जगन्नाथ द्वाभ्यां स्तौति जगद्पते ॥ १७॥

तं त्वां नताः स्म देवेश ऋग्यजुःसामरूपिणम् ।
अकारोऽसि जगन्नाथ तथैवोकारसंज्ञितः ॥ १८॥

मकारोऽसि तथा विष्णो नमस्ते प्रणवात्मक ।
उद्गीथाय नमो नित्यं नमो होत्रे जनार्दन ॥ १९॥

अध्वर्यवे नमस्तुभ्यं यष्टृरूपाय ते नमः ।
चातुर्होत्र नमस्तुभ्यं चातुर्वर्ण्यविभावन ॥ २०॥

जगत्सर्वं त्वमेवासि जगच्च त्वयि तिष्ठति ।
संहर्ता चासि जगतां तथा पाता जगत्पते ॥ २१॥

स्रष्टासि च तथा देव स्थितौ स्थितिमतां वर ।
वासुदेवेश भो विष्णो त्वयि सृष्टिं जगत्पते ॥ २२॥

नमः सर्वात्मने तुभ्यं सर्वभूतहृदि स्थित ।
सर्वात्मन् सर्वकर्तासि सर्वभावनभावन ।
नमः सर्वात्मने तुभ्यं भूयो भूयो नमो नमः ॥ २३॥

इति हरिवंशान्तर्गतं बदरीवासिभिः मुनिभिः कृतं
                 श्रीकृष्णस्तोत्रं सम्पूर्णम् ।

हरिवंश । अनुबन्ध - परिशिष्ट । अध्याय अ२७.४९॥


harivaMsha . anubandha - parishiShTa . adhyAya a27.49..

Proofread by PSA Easwaran