Bhishmrikritam Shri Krishna Stotram

भीष्मृकृतं श्रीकृष्णस्तोत्रम्

श्रुत्वा तु वचनं भीष्मो वासुदेवस्य धीमतः । किञ्चिदुन्नाम्य वदनं प्राञ्जलिर्वाक्यमब्रवीत् ॥ १॥ नमस्ते भगवन्विष्णो लोकानां निधनोद्भव । त्वं हि कर्ता हृषीकेश संहर्ता चापराजितः ॥ २॥ विश्वकर्मन्नमस्तेऽस्तु विश्वात्मन्विश्वसम्भव । अपवर्गोऽसि भूतानां पञ्चानां परतः स्थितः ॥ ३॥ नमस्ते त्रिषु लोकेषु नमस्ते परतस्त्रिषु । योगेश्वर नमस्तेऽस्तु त्वं हि सर्वपरायणम् ॥ ४॥ मत्संश्रितं यदात्थ त्वं वचः पुरुषसत्तम । तेन पश्यामि ते दिव्यान्भावान्हि त्रिषु वर्त्मसु ॥ ५॥ तच्च पश्यामि तत्त्वेन यत्ते रूपं सनातनम् । सप्त मार्गा निरुद्धास्ते वायोरमिततेजसः ॥ ६॥ दिवं ते शिरसा व्याप्तं पद्भ्यां देवी वसुन्धरा । दिशो भुजौ रविश्चक्षुर्वीर्ये शक्रः प्रतिष्ठितः ॥ ७॥ अतसीपुष्पसङ्काशं पीतवाससमच्युतम् । वपुर्ह्यनुमिमीमस्ते मेघस्येव सविद्युतः ॥ ८॥ त्वत्प्रपन्नाय भक्ताय गतिमिष्टां जिगीषवे । यच्छ्रेयः पुण्डरीकाक्ष तद्ध्यायस्व सुरोत्तम ॥ ९॥ इति महाभारते शान्तिपर्वणि ५१ अध्यायान्तर्गतं भीष्मृकृतं श्रीकृष्णस्तोत्रं सम्पूर्णम् । महाभारत । शान्तिपर्व । अध्याय ५१/२-४॥ mahAbhArata . shAntiparva . adhyAya 51/2-4.. Proofread by PSA Easwaran