Brahmadibhih Kritam Hari Stotram

ब्रह्मादिभिः कृतं हरिस्तोत्रम्

तावद्ब्रह्मादयस्तत्राऽऽययुस्तुष्टुवुरीश्वरम् । ``अलं चाऽलं हरे शान्तिं गृहाण परमेश्वर ॥ ४३॥ असाध्यं ते न वै किञ्चिच्छ्रीपतेः परमात्मनः । वरुणो दग्धतां यातो जलं नष्टं प्रजायते ॥ ४४॥ जलहीनं जगत्सर्वं नाशं क्षणात्प्रयास्यति । प्रसीद त्वं कृपासिन्धो निवारयाऽस्त्रमुल्बणम् ॥ ४५॥ उज्जीवय च वरुणं जलहेतुं सुरं प्रभो । नमस्ते रुद्ररूपाय सङ्कर्षणाय ते नमः ॥ ४६॥ महाकालस्वरूपाय मृत्युरूपाय ते नमः । सर्वसंहारकृत्कृष्ण साधुरूपाय ते नमः ॥ ४७॥ क्षत्रान्तकाय देवानां हिताय च नमो नमः । सतां हिताय रामाय श्रीहरये ते नमो नमः'' ॥ ४८॥ इतिस्तुतो हरिस्तत्र वीक्ष्य देवान् पुरःस्थितान् । शान्तिमासाद्य वह्न्यस्त्रं निजग्राह निवृत्तये ॥ ४९॥ इति श्रीलक्ष्मीनारायणीयसंहितायाः द्वापरयुगसन्तानात्मकस्य तृतीयखण्डे ९४-अध्यायान्तर्गतं ब्रह्मादिभिः कृतं हरिस्तोत्रं सम्पूर्णम् । लक्ष्मीनारायणीयसंहिता । खण्ड ३। अध्याय ९४/४३-४९॥ lakShmInArAyaNIyasaMhitA . khaNDa 3. adhyAya 94/43-49.. Proofread by PSA Easwaran