Brahmadibhih Kritam Varaha Stotram

 ब्रह्मादिभिः कृतं वराहस्तोत्रम् ६ 

ब्रह्मा च ऋषयः सर्वे नारदाद्या मुनीश्वराः ।
तुष्टुवुः कृतकार्यं तं सौम्यं पृथ्वीधरं हरिम् ॥ २९॥

नमो यज्ञस्वरूपाय चितीमुखाय ते नमः ।
वेदपाद्युपदंष्ट्राय तत्क्रतुवक्षसे नमः ॥ ३०॥

अनलजिह्वाय दर्भरोम्णे तपस्विने नमः ।
ब्रह्मशिर्ष्णे नमो वेदतदङ्गश्रुतिस्रग्विणे ॥ ३१॥

अहोरात्रक्षणधृगे नमः स्रुवसुतुण्डिने ।
नमः सदाज्यनासाय सामघोषस्वनाय च ॥ ३२॥

महते सत्यधर्माय नमो विक्रमशालिने ।
प्रायश्चित्तरथाय ॐ घोराय पशुजानवे ॥ ३३॥

उद्गात्रन्त्राय देवाय होमलिङ्गाय ते नमः ।
स्थानबीजाय देवाय सन्महौषधये नमः ॥ ३४॥

नमो मन्त्रस्फिजे भूम्ने नमो वेद्यान्तरात्मने ।
नम आज्यस्पृजे सोमशोणिताय च ते नमः ॥ ३५॥

वेदस्कन्धाय शान्ताय हविर्गन्धाय ते नमः ।
हव्यकव्यातिवेगाय नमः प्राग्वंशदेहिने ॥ ३६॥

नमो द्युतिमते नानादीक्षान्विताय ते नमः ।
नमस्ते दक्षिणाहृदे योगिने सत्ररूपिणे ॥ ३७॥

नमः प्रवर्ग्यवित्तादिभूषणाय महात्मने ।
उपाकर्मेष्टिरुचिरब्रह्मणे प्रभवे नमः ॥ ३८॥

नानाछन्दोगतिपथजुषे प्राणाय ते नमः ।
नमो गुह्योपनिषदासनाय सवनाय ते ॥ ३९॥

इति स्तुतः परो देवो ह्याशीर्दत्वा तिरोदधे ।

इति श्रीलक्ष्मीनारायणीयसंहितायां प्रथमे कृतयुगसन्ताने ५०-अध्यायान्तर्गतं
ब्रह्मादिभिः कृतं वराहस्तोत्रं सम्पूर्णम् ।

लक्ष्मीनारायणीयसंहिता । खण्ड १। अध्याय ५०/२९-३९॥


lakShmInArAyaNIyasaMhitA . khaNDa 1. adhyAya 50/29-39..

Proofread by PSA Easwaran