Brahmana Kritam 2 Vishnu Stotram

ब्रह्मणा कृतं २ विष्णुस्तोत्रम्

ब्रह्मोवाच । नमो नमस्तेऽस्तु सहस्रमूर्ते सहस्रबाहो बहुवक्त्रपाद । नमो नमस्ते जगतः प्रवृत्तिविनाशसंस्थानपराप्रमेय ॥ २१॥ सूक्ष्मातिसूक्ष्मं च बृहत्प्रमाणं गरीयसामप्यतिगौरवात्मन् । प्रधानबुद्धीन्द्रियवाक्प्रधानमूलापरात्मन्भगवन्प्रसीद ॥ २२॥ एषा मही देव महीप्रसूतैर्महासुरैः पीडितशैलबन्धा । परायणं त्वां जगतामुपैति भारावतारार्थमपारपारम् ॥ २३॥ एते वयं वृत्ररिपुस्तथाऽयं नासत्यदस्रौ वरुणस्तथैषः । इमे च रुद्रा वसवः ससूर्याः समीरणाग्निप्रमुखास्तथाऽन्ये ॥ २४॥ सुराः समस्ताः सुरनाथ कार्यमेभिर्मया यच्च तदीश सर्वम् । आज्ञापयाज्ञां प्रतिपालयन्तस्तवैव तिष्ठाम सदाऽस्तदोषाः ॥ २५॥ इति ब्रह्मपुराणे एकाशीत्यधिकशततमाध्यायान्तर्गतं ब्रह्मणा कृतं विष्णुस्तोत्रं समाप्तम् । ब्रह्मपुराण । अध्याय १८१/२१-२५॥ brahmapurANa . adhyAya 181/21-25.. Proofread by PSA Easwaran