Brahmakritam 02 Vishnu Stotram

ब्रह्मकृतं २ विष्णुस्तोत्रम्

ब्रह्मोवाच । नमस्ते जगदाधार शङ्खचक्रगदाधर ॥ १७॥ यन्नाभिपङ्कजादेव जातोऽहं विश्वसृष्टिकृत् । परमार्थस्वरूपं ते त्वं वै वेत्सि जगन्मय ॥ १८॥ यन्मायया जगत्सर्वं निर्मितं महदादिकम् । यन्निःश्वाससमुद्भूतं शब्दब्रह्म त्रिधाऽभवत् ॥ १९॥ उपजीव्य तदेवाहमसृजं भुवनानि वै । त्वत्तो नान्यः स्थूलसूक्ष्मदीर्घह्रस्वादि किञ्चन ॥ २.१.२०॥ विकारभेदैर्भगवंस्त्वमेवेदं चराचरम् । कटकादि यथा स्वर्णं गुणत्रयविभागशः ॥ २१॥ स्रष्टा सृज्यं त्वमेवात्र पोष्टा पोष्यं जगत्प्रभो । आधारो ध्रियमाणं च धर्त्ता त्वं परमेश्वर ॥ २२॥ त्वत्प्रेरितमतिः सर्वश्चरते च शुभाऽशुभम् । ततः प्राप्नोति सदृशीं त्वयैव विहितां गतिम् ॥ २३॥ जगतोऽस्य गतिर्भर्त्ता साक्षी त्वं परमेश्वर । चराचरगुरो सर्वजीवभूत कृपामय । प्रसीदाद्य जगन्नाथ नित्यं त्वच्छरण्यस्य मे ॥ २४॥ इति श्रीस्कन्दपुराणे वैष्णवखण्डे पुरुषोत्तमजगन्नाथमाहात्म्ये प्रथमाध्यायान्तर्गतं ब्रह्मकृतं विष्णुस्तोत्रं समाप्तम् । स्कन्दपुराण । वैष्णवखण्ड । पुरुषोत्तमखण्ड । अध्याय १/१६-२४॥ skandapurANa . vaiShNavakhaNDa . puruShottamakhaNDa . adhyAya 1/16-24.. Proofread by PSA Easwaran