Brahmakritam 15 Vishnu Stotram

 ब्रह्मकृतं १५ विष्णुस्तोत्रम् 

ब्रह्मन्कथं त्वया संस्मारितोऽहं द्वापुरे युगे ॥ २०॥

ब्रह्मोवाच ।
तदा देवं सर्वगं भिषजां वरम् ।
नमस्करोमि देवेश वन्दे युगलपङ्कजम् ॥ २१॥

नमो ह्यणुस्वरूपाय द्व्यणुकाय नमो नमः ।
त्र्यणुकाय नमश्चतुरणुकाय नमो नमः ॥ २२॥

नमः पञ्चाणुरूपाय रजोरूपाय ते नमः ।
नमो धूलीस्वरूपाय नमस्ते कङ्करात्मने ॥ २३॥

नमो ग्रावस्वरूपाय नमस्ते पिण्डनामिने ।
नमः पिण्डाढ्यबीजाय नमोऽव्यक्ताङ्कुरात्मने ॥ २४॥

नमः पत्रस्वरूपाय नमः काण्डादिरूपिणे ।
नमः शाखप्रशाखाय नमः स्तम्बादिहेतवे ॥ २५॥

नमो नालाय पुष्पाय नमो रसफलात्मने ।
नमः कणस्वरूपाय नमः पिष्टरसात्मने ॥ २६॥

नमोऽपाकजरूपाय पक्वरूपाय ते नमः ।
नमो भक्ष्यभोज्यलेह्यचोष्यरूपाय ते नमः ॥ २७॥

नमो मिश्रस्वरूपाय नम ओषधिरूपिणे ।
नमः क्वाथादिरूपाय नमश्चूर्णादिरूपिणे ॥ २८॥

नमो रेचकमात्राय नमो भस्मादिवेदिने ।
नम आयुःप्रदात्रे ते नम ओषधिशक्तये ॥ २९॥

नमस्ते परमेशान क्षेमकुशलकीर्तये ।
भोक्त्रे भोग्यप्रदानाय सर्वान्तर्यामिणे नमः ॥ ३०॥

देवदेव शरीराणां धाता त्वं पोषकोऽविता ।
युगेऽस्मिन्कल्पनासिद्धिर्लयं प्रयाति देहिनाम् ॥ ३१॥

इति श्रीलक्ष्मीनारायणीयसंहितायां प्रथमे कृतयुगसन्ताने ७८-अध्यायान्तर्गतं
ब्रह्मकृतं विष्णुस्तोत्रं सम्पूर्णम् ।

लक्ष्मीनारायणीयसंहिता । खण्ड १। अध्याय ७८/२०-३१॥


lakShmInArAyaNIyasaMhitA . khaNDa 1. adhyAya 78/20-31..

Proofread by PSA Easwaran