श्रीदारुब्रह्मताण्डवम्
धडद्-धडद्-धडद्-धडद्-पहण्डिशब्दमण्डितं
घडर्-घडर्-घडर्-घडर्-रथीयनादकम्पितम् ।
थथै-थथै-थथै-थथै-मृदुङ्गलास्यशोभितं
स्मरन् स्मरन् स्मरन् स्मरन् नमामि दारुदैवतम् ॥ १॥
सुनीलशैलराजितं सुनीलचक्रभूषितं
सुनीलसागरस्थितं सुपीतवस्त्रभासितम् ।
सुभद्रभद्रसंयुतं सुभद्रिकासमन्वितं
सुवर्णपीठसंस्थितं नमामि दारुदैवतम् ॥ २॥
सुनिम्बदारुवेरकं धराधराभधारकं
मयूरपिच्छधारकं सुवर्णहारधारकम् ।
सुवर्त्तुलाक्षिधारकं विचित्रचित्रधारकं
रथप्रमोदवर्द्धकं नमामि दारुदैवतम् ॥ ३॥
सुतीक्ष्णचक्रनायकं विशालशार्ङ्गसायकं
विशिष्टशङ्खधारकं सुलीलपद्मधारकम् ।
प्रमत्तदैत्यदारकं प्रभूतशान्तिकारकं
अनल्पपुण्यदायकं नमामि दारुदैवतम् ॥ ४॥
गजेशराजपूजितं सुनन्दिघोषवन्दितं
सुरेन्द्रनित्यनन्दितं विनन्द्यकीर्त्तिराजितम् ।
रिपुप्रतापतापकं समग्रलोकपालकं
यमप्रकोपतारकं नमामि दारुदैवतम् ॥ ५॥
खगेश्वरं गदेश्वरं भवेश्वरं शिवेश्वरं
महीश्वरं महेश्वरं सुदर्शनेश्वरं वरम् ।
कलीश्वरं कलेश्वरं हलीश्वरं सुरेश्वरं
पुरेश्वरं पुरीश्वरं नमामि दारुदैवतम् ॥ ६॥
रथेश्वरं पथेश्वरं नटेश्वरं वटेश्वरं
सुधीश्वरं सदीश्वरं हृदीश्वरं नदीश्वरम् ।
मखेश्वरं क्षमेश्वरं जनेश्वरं दयेश्वरं
विशिष्टकन्दरीश्वरं नमामि दारुदैवतम् ॥ ७॥
गुणेश्वरं गुणीश्वरं गिरेश्वरं गिरीश्वरं
मुनीश्वरं शुभेश्वरं दरिद्रमानुषेश्वरम् ।
जवाधरं रमाधरं नगाधरं धराधरं
परात्परं तमोहरं नमामि दारुदैवतम् ॥ ८॥
पदाम्बुजं कराम्बुजं दृगम्बुजं मुखाम्बुजं
विभिन्नरूपधारकं गजेन्द्रमुक्तिकारकम् ।
महाप्रसाददायकं सुभक्तिभुक्तिदायकं
करालकालनाशकं नमामि दारुदैवतम् ॥ ९॥
प्रशस्तरम्यमन्दिरं प्रकृष्टकृष्णसुन्दरं
सुभक्तमोक्षदायकं समग्रविश्वनायकम् ।
अखण्डभाग्यकारकं प्रचण्डपापहारकं
प्रमाददावदाहकं नमामि दारुदैवतम् ॥ १०॥
समस्तनष्टशासकं समस्तकष्टनाशकं
समस्तमन्दवारकं समस्ततापतारकम् ।
समस्तदिव्यकामदं समस्तभव्यमानदं
समस्तसौख्यदायकं नमामि दारुदैवतम् ॥ ११॥
सदा जगत्पतिस्तुतिर्ददाति सौख्यसंहतिं
स्मरन् पठन् जपन् जनः प्रयाति पूतपद्धतिम् ।
हृदा मुदा द्विजव्रजः प्रणौति तं महाप्रभुं
ददातु शुद्धभावनां धनं धियं सुखं शुभम् ॥ १२॥
इति श्रीव्रजकिशोरत्रिपाठीविरचितं श्रीदारुब्रह्मताण्डवं सम्पूर्णम् ।
Dārubrahma (दारुब्रह्म) refers to
Śrī Jagannāthadeva, transcendence within
wooden form.
Composed, encoded, and proofread by Vrajakishora