Devadibhih Kritam Varaha Stotram

देवादिभिः कृतं वराहस्तोत्रम् ७

तत्र क्षीरनिधेस्तीरे क्रोडरूपं महाहरिम् ॥ ३७॥ दृष्ट्वा वै देवता भक्तिनम्रास्तुष्टुवुरादरात् । नमो महावराहाय सुयज्ञमूर्तये नमः ॥ ३८॥ नमो मेरुस्वरूपाय दैत्यघ्नाय नमो नमः । नमो महासुदंष्ट्राय धरणीधारिणे नमः ॥ ३९॥ समग्रवेदवेदाङ्गमूर्तये ते नमो नमः । नमः सहस्रहस्ताय नमो विश्वस्वरूपिणे ॥ ४०॥ सर्गस्थितिस्वरूपाय नमः कालस्वरूपिणे । नूत्नरूपधृते ते च सर्वत्राऽत्रे नमो नमः ॥ ४१॥ श्रीभूलीलारमालक्ष्मीकम्भरापतये नमः । नमः शान्तस्वरूपाय सर्वान्तर्यामिणे नमः ॥ ४२॥ इति स्तुत्वा तया देवैर्मुनिभिः ऋषिभिर्भुवा । वाराहस्य हरेः पूजा कृतास्रक्चन्दनादिभिः ॥ ४३॥ इति श्रीलक्ष्मीनारायणीयसंहितायां प्रथमे कृतयुगसन्ताने १३४-अध्यायान्तर्गतं देवादिभिः कृतं वराहस्तोत्रं सम्पूर्णम् । लक्ष्मीनारायणीयसंहिता । खण्ड १। अध्याय १३४/३७-४३॥ lakShmInArAyaNIyasaMhitA . khaNDa 1. adhyAya 134/37-43.. Proofread by PSA Easwaran