Devadanavaih Kritam Vishnu Stotram

देवदानवैः कृतं विष्णुस्तोत्रम्

देवदानवा ऊचुः । नमो लोकत्रयाध्यक्ष तेजसा जितभास्कर । नमो विष्णो नमो जिष्णो नमस्ते कैटभार्दन ॥ ३७॥ नमः सर्गक्रियाकर्त्रे जगत्यालयते नमः । रुद्ररूपाय शर्वाय नमः संहारकारिणे ॥ ३८॥ नमः शूलायुधाधृष्य नमो दानवघातिने । नमः क्रमत्रयाक्रान्त त्रैलोक्यायाभवाय च ॥ ३९॥ नमः प्रचण्डदैत्येन्द्रकुलकालमहानल । नमो नाभिह्रदोद्भूतपद्मगर्भ महाबल ॥ ४०॥ पद्मभूत महाभूत कर्त्रे हर्त्रे जगत्प्रिय । जनिता सर्वलोकेश क्रियाकारणकारिणे ॥ ४१॥ अमरारिविनाशाय महासमरशालिने । लक्ष्मीमुखाब्जमधुप नमः कीर्तिनिवासिने ॥ ४२॥ अस्माकममरत्वाय ध्रियतां ध्रियतामयम् । मन्दरः सर्वशैलानामयुतायुतविस्तृतः ॥ ४३॥ अनन्तबलबाहुभ्यामवष्ठभ्यैकपाणिना । मथ्यताममृतं देव स्वधास्वाहार्थकामिनाम् ॥ ४४॥ इति मत्स्यपुराणे एकोनपञ्चाशदधिकद्विशततमाध्यायान्तर्गतं देवदानवैः कृतं विष्णुस्तोत्रं समाप्तम् । मत्स्यपुराण । अध्याय २४९/३७-४४॥ matsyapurANa . adhyAya 249/37-44.. Proofread by PSA Easwaran