Devaih Kritam 01 Vishnu Stotram

देवैः कृतं १ विष्णुस्तोत्रम्

देवा ऊचुः । त्वं त्राता जगतां नाथ देवानां कीर्तिवर्धन । सर्वेश्वर जगद्योने त्रयीमूर्ते नमोऽस्तु ते ॥ ७॥ लोकस्रष्टाऽसुरान्हन्ता त्वमेव जगतां पतिः । स्थित्युत्पत्तिविनाशानां कारणं त्वं जगन्मय ॥ ८॥ त्राता न कोऽप्यस्ति जगत्त्रयेऽपि शरीरिणां सर्वविपद्गतानाम् । त्वया विना वारिजपत्रनेत्र तापत्रयाणां शरणं न चान्यत् ॥ ९॥ पिता च माता जगतोऽखिलस्य त्वमेव सेवासुलभोऽसि विष्णो । प्रसीद पाहीश महाभयेभ्योऽस्मदार्तिहन्ता वद कस्त्वदन्यः ॥ १०॥ आदिकर्ता वराहस्त्वं मत्स्यः कूर्मस्तथैव च । इत्यादिरूपभेदैर्नो रक्षसे भय आगते ॥ ११॥ हृतस्वाम्यान्सुरगणान् हृतदारान्गतापदः । कस्मान्न रक्षसे देव अनन्यशरणान् हरे ॥ १२॥ इति ब्रह्मपुराणे एकसप्ततितमाध्यायान्तर्गतं देवैः कृतं विष्णुस्तोत्रं समाप्तम् । ब्रह्मपुराण । अध्याय ७१/७-१२॥ brahmapurANa . adhyAya 71/7-12.. Proofread by PSA Easwaran