Devaih Kritam 03 Vishnu Stotram

देवैः कृतं ३ विष्णुस्तोत्रम्

देवा ऊचुः । नारायणाक्षरानन्त शरणागतपालक । मृकण्डुतपसा त्रस्तान् पाहि नः शरणागतान् ॥ ५५॥ जय देवाधिदेवेश जय शङ्खगदाधर । जयो लोकस्वरूपाय जयो ब्रह्माण्डहेतवे ॥ ५६॥ नमस्ते देवदेवेश नमस्ते लोकपावन । नमस्ते लोकनाथाय नमस्ते लोकसाक्षिणे ॥ ५७॥ नमस्ते ध्यानगम्याय नमस्ते ध्यानहेतवे । नमस्ते ध्यानरूपाय नमस्ते ध्यानसाक्षिणे ॥ ५८॥ केशिहन्त्रे नमस्तुभ्यं मधुहन्त्रे परात्मने । नमो भूम्यादिरूपाय नमश्चैतन्यरूपिणे ॥ ५९॥ नमो ज्येष्ठाय शुद्धाय निर्गुणाय गुणात्मने । अरूपाय स्वरूपाय बहुरूपाय ते नमः ॥ ६०॥ नमो ब्रह्मण्यदेवाय गोब्राह्मणहिताय च । जगद्धिताय कृष्णाय गोविन्दाय नमो नमः ॥ ६१॥ नमो हिरण्यगर्भाय नमो ब्रह्मादिरूपिणे । नमः सूर्यादिरूपाय हव्यकव्यभुजे नमः ॥ ६२॥ नमो नित्याय वन्द्याय सदानन्दैकरूपिणे । नमः स्मृतार्तिनाशाय भूयो भूयो नमो नमः ॥ ६३॥ एवं देवस्तुतिं श्रुत्वा भगवान् कमलापतिः । प्रत्यक्षतामगात्तेषां शङ्खचक्रगदाधरः ॥ ६४॥ इति नारदपुराणे पूर्वभागे चतुर्थाध्यायान्तर्गतं देवैः कृतं विष्णुस्तोत्रं समाप्तम् । बृहन्नारदीयपुराण । पूर्वभाग । अध्याय ४/५५-६३॥ bRRihannAradIyapurANa . pUrvabhAga . adhyAya 4/55-63.. Proofread by PSA Easwaran