Devaih Kritam 04 Vishnu Stotram

 देवैः कृतं ४ विष्णुस्तोत्रम् 

देवा ऊचुः ।
नताः स्म विष्णुं जगदेकनाथं स्मरत्समस्तार्तिहरं परेशम् ।
स्वभावशुद्धं परिपूर्णभावं वदन्ति यज्ज्ञानतनुं च तज्ज्ञाः ॥ १६-५४॥

ध्येयः सदा योगिवरैर्महात्मा स्वेच्छाशरीरैः कृतदेवकार्यः ।
जगत्स्वरूपो जगदादिनाथस्तस्मै नताः स्मः पुरुषोत्तमाय ॥ १६-५५॥

यनन्नामसङ्कीर्त्तनतो खलानां समस्तपापानि लयं प्रयान्ति ।
तमीशमीड्यं पुरुषं पुराणं नताः स्म विष्णुं पुरुषार्थसिद्ध्यै ॥ १६-५६॥

यत्तेजसा भान्ति दिवाकराद्या नातिक्रमन्त्यस्य कदापि शिक्षाः ।
कालात्मकं तं त्रिदशाधिनाथं नमामहे वै पुरुषार्थरूपम् ॥ १६-५७॥

जगत्करोऽत्यब्जभवोऽत्ति रुद्रः पुनाति लोकाञ्छ्रुतिभिश्च विप्राः ।
तमादिदेवं गुणसन्निधानं सर्वोपदेष्टारमिताः शरण्यम् ॥ १६-५८॥

वरं वरेण्यं मधुकैटभारिं सुरासुराभ्यर्चितपादपीठम् ।
सद्भक्तिसङ्कल्पितसिद्धिहेतुं ज्ञानैकवेद्यं प्रणताः स्म देवम् ॥ १६-५९॥

अनादिमध्यान्तमजं परेशमनाद्यविद्याख्यतमोविनाशम् ।
सच्चित्परानन्दघनस्वरूपं रूपादिहीनं प्रणताः स्म देवम् ॥ १६-६०॥

नारायणं विष्णुमनन्तमीशं पीताम्बरं पद्मभवादिसेव्यम् ।
यज्ञप्रियं यज्ञकरं विशुद्धं नताः स्म सर्वोत्तममव्ययं तम् ॥ १६-६१॥

इति नारदपुराणे पूर्वभागे षोडसाध्यायान्तर्गतं
         देवैः कृतं विष्णुस्तोत्रं समाप्तम् ।

बृहन्नारदीयपुराण । पूर्वभाग । अध्याय १६/५४-६१॥


bRRihannAradIyapurANa . pUrvabhAga . adhyAya 16/54-61..

Proofread by PSA Easwaran