Devaih Kritam 09 Vishnu Stotram

 देवैः कृतं ९ विष्णुस्तोत्रम् 

देवा ऊचुः ।
ॐ नमो भगवते तुभ्यं वासुदेवाय धीमहि ।
प्रद्युम्नायानिरुद्धाय नमः सङ्कर्षणाय च ॥ २२॥

ॐ कारब्रह्मरूपाय त्रेधाऽऽविष्कृतमूर्तये ।
ब्रह्माण्डसर्गस्थित्यन्तहेतवे निर्गुणाय च ॥ २३॥

नयनानन्दरूपाय प्रणतक्लेशनाशिने ।
केशवाय नमस्तुभ्यं स्वतन्त्रेश्वरमूर्तये ॥ २४॥

मोदिताशेषभक्ताय कालमायादिमोहिने ।
सदानन्दाय कृष्णाय नमः सद्धर्मवर्त्तिने ॥। २५॥

भवाम्बुधिनिमग्नानामुद्धृतिक्षमकीर्तये ।
दर्शनीयस्वरूपाय घनश्यामाय ते नमः ॥ २६॥

गदाब्जदरचक्राणि बिभ्रते दीर्घबाहुभिः ।
सुरगोविप्रधर्माणां गोप्त्रे तुभ्यं नमो नमः ॥ २७॥

वरेण्याय प्रपन्नानामभीष्टवरदायिने ।
निगमागमवेद्याय वेदगर्भाय ते नमः ॥ २८॥

तेजोमण्डलमध्यस्थदिव्यसुन्दरमूर्तये ।
नमामो विष्णवे तुभ्यं परात्परतराय च ॥ २९॥

वाणीमनोविप्रकृष्टमहिम्नेऽक्षररूपिणे ।
सर्वान्तर्यामिणे तुभ्यं बृहते च नमो नमः ॥ ९.१०.३०॥

सुखदोऽसि त्वमेवैकः स्वाश्रितानामतो वयम् ।
महापदाधिकक्लिष्टाः शरणं त्वामुपागताः ॥ ३१॥

देवाधिदेवभक्तस्य तव दुर्वाससो वयम् ।
अतिक्रमाच्छ्रिया हीनाः प्राप्ताः स्मो दुर्दशामिमाम् ॥ ३२॥

वासोऽन्नपानस्थानादिहीनान्धर्मोऽपि नः प्रभो ।
त्यक्त्वा सह श्रिया यातस्तान्पातुं त्वमसीश्वरः ॥ ३३॥

यतो वयं च धर्मश्च त्वदीया इति विश्रुताः ।
यथापूर्वं सुखीकर्त्तुं त्वमेवार्हस्यतो हि नः ॥ ३४॥

इति श्रीस्कन्दपुराणे वैष्णवखण्डे वासुदेवमासमाहात्म्ये दशमाध्यायान्तर्गतं
         देवैः कृतं विष्णुस्तोत्रं समाप्तम् ।

स्कन्दपुराण । वैष्णवखण्ड । वासुदेवखण्ड । अध्याय १०/२२-३४॥


skandapurANa . vaiShNavakhaNDa . vAsudevakhaNDa . adhyAya 10/22-34..

Proofread by PSA Easwaran