Devaih Kritam 10 Vishnu Stotram

देवैः कृतं १० विष्णुस्तोत्रम्

देवा ऊचुः । नमस्तेऽस्तु जगद्बीज नमस्ते कमलापते । नमस्तेऽस्तु सुरेशान नमस्ते कमलेक्षण ॥ १॥ त्वं स्थितिः सर्वभूतानां त्वमेव शरणं सताम् । त्वं हन्ता सर्वदुष्टानां हयग्रीव नमोऽस्तु ते ॥ २॥ त्वमोङ्कारो वषट्कारः स्वाहा स्वधा चतुर्विधा । आद्यस्त्वं च सुरेशान त्वमेव शरणं सदा ॥ ३॥ यज्ञो यज्ञपतिर्यज्वा द्रव्यं होता हुतस्तथा । त्वदर्थं हूयते देव त्वमेव शरणं सखा ॥ ४॥ कालः करालरूपस्त्वं त्वं वार्कः शीतदीधितिः । त्वमग्निर्वरुणश्चैव त्वं च कालक्षयङ्करः ॥ ५॥ गुणत्रयं त्वमेवेह गुणहीनस्त्वमेव हि । गुणानामालयस्त्वं च गोप्ता सर्वेषु जन्तुषु ॥ ६॥ स्त्रीपुंसोश्च द्विधा त्वं च पशुपक्ष्यादिमानवैः । चतुर्विधं कुलं त्वं हि चतुराशीतिलक्षणः ॥ ७॥ दिनान्तश्चैव पक्षान्तो मासान्तो हायनं युगम् । कल्पान्तश्च महान्तश्च कालान्तस्त्वं च वै हरे ॥ ८॥ इति स्कन्दपुराणे ब्रह्मखण्डे धर्मारण्यखण्डे पञ्चदशाध्यायान्तर्गतं देवैः कृतं विष्णुस्तोत्रं समाप्तम् । स्कन्दपुराण । ब्राह्मखण्ड । धर्मारण्यखण्ड । अध्याय १५/११-१८॥ skandapurANa . brAhmakhaNDa . dharmAraNyakhaNDa . adhyAya 15/11-18.. Proofread by PSA Easwaran