Devaih Kritam 15 Vishnu Stotram

देवैः कृतं १५ विष्णुस्तोत्रम्

ततो देवाः समेतास्ते तदोचुर्मधुसूदनम् । त्वं नः स्रष्टा च पाता च भर्ता च जगतः प्रभो । त्वया सृष्टमिदं सर्वं यच्चेङ्गं यच्च नेङ्गति ॥ १८॥ त्वया भूमिः पुरा नष्टा समुद्रात्पुष्करेक्षण । वाराहं रूपमास्थाय जगदर्थे समुद्धृता ॥ १९॥ आदिदैत्यो महावीर्यो हिरण्यकशिपुस्त्वया । नारसिंहं वपुः कृत्वा सूदितः पुरुषोत्तम ॥ २०॥ अवध्यः सर्वभूतानां बलिश्चापि महासुरः । वामनं वपुराश्रित्य त्रैलोक्याद्भ्रंशितस्त्वया ॥ २१॥ असुरश्च महेष्वासो जम्भ इत्यभिविश्रुतः । यज्ञक्षोभकरः क्रूरस्त्वयैव विनिपातितः ॥ २२॥ एवमादीनि कर्माणि येषां सङ्ख्या न विद्यते । अस्माकं भयभीतानां त्वं गतिर्मधुसूदन ॥ २३॥ तस्मात्त्वां देव देवेश लोकार्थं ज्ञापयामहे । रक्ष लोकांश्च देवांश्च शक्रं च महतो भयात् ॥ २४॥ इति महाभारते आरण्यकपर्वणि १०० अध्यायान्तर्गतं देवैः कृतं विष्णुस्तोत्रं सम्पूर्णम् । महाभारत । आरण्यकपर्व । अध्याय १००/१८-२४॥ पद्मपुराण । सृष्टिखण्ड । अध्याय १९/११९-१२९॥ mahAbhArata . AraNyakaparva . adhyAya 100/18-24.. Also, padmapurANa . sRiShTikhaNDa . adhyAya 19/119-129.. Proofread by PSA Easwaran