Devaih Kritam Narayana Stotram

देवैः कृतं नारायणस्तोत्रम्

ततो दुःखं परं प्राप्ता उद्विग्ना लोकपालिनः । ऋषयो मुनयश्चैव ब्राह्मणा नष्टरक्षणाः ॥ ३८॥ देवाश्च पितरश्चान्ये ये ये दुःखदशान्विताः । ते सर्वे क्षीरधेस्तीरे शरणं ययुरच्युतम् ॥ ३९॥ नमः शरण्याय शान्तस्वरूपाय नमो नमः । दुःखावासाय दैत्यांशलक्ष्मीस्थिताय ते नमः ॥ ४०॥ रक्षाकर्त्रे यतिसन्यासार्थिने हरये नमः । परिवर्तनिवासाय परिवर्तात्मने नमः ॥ ४१॥ बहुकालं स्वभक्ताय दैत्याय सार्वभौमकम् । दत्तवान् साम्प्रतं दैत्यभिन्नेभ्यो दातुमर्हसि ॥ ४२॥ सुरादिवाञ्च्छितं चापि कृपया दातुमर्हसि । परावर्तं कुरु विष्णो त्वसह्यः समयो गतः ॥ ४३॥ इति प्रार्थ्य सुराः सर्वे क्षीराब्ध्युत्तरभूतले । समाधौ सुस्थिताश्चान्ये जपयज्ञे व्यवस्थिताः ॥ ४४॥ इति श्रीलक्ष्मीनारायणीयसंहितायां प्रथमे कृतयुगसन्ताने १३६-अध्यायान्तर्गतं देवैः कृतं नारायणस्तोत्रं सम्पूर्णम् । लक्ष्मीनारायणीयसंहिता । खण्ड १। अध्याय १३६/३८-४४॥ lakShmInArAyaNIyasaMhitA . khaNDa 1. adhyAya 136/38-44.. Proofread by PSA Easwaran