Devaih Kritam Purushottama Stotram

देवैः कृतं पुरुषोत्तमस्तोत्रम् ८

मृतप्राया अभवँश्च देवाश्चाऽमृतवर्जिताः । किरणाधारजीवाश्च सर्वे मरणशालिनः ॥ ४.३०॥ तदा जाताश्चाथ देवाः स्वगुरोः शरणं ययुः । सदस्पतिर्देवगुरुश्चाऽस्तौन्मां परमेश्वरम् ॥ ३१॥ चन्द्रस्य रक्षणार्थाय लोकरक्षणहेतवे । नमो देवाधिदेवाय सूर्यचन्द्रप्रचक्षुषे ॥ ३२॥ सर्वान्तर्यामिणे रक्षाकराय परमात्मने । पुरुषोत्तमसंज्ञाय सुधाप्रदाय शार्ङ्गिणे ॥ ३३॥ ग्रहनक्षत्रताराणां भास्कराय महात्मने । नमश्चान्तरवेद्याय चाऽभक्तक्षयकारिणे ॥ ३४॥ समायाहि हरे शीघ्रं रक्षां त्वं शशिनः कुरु । महादेवो ध्यानमग्नश्चिरकारी विराजते ॥ ३५॥ शीघ्रं धूम्राद्रक्ष मुक्तपते श्रीपरमेश्वर । स्तुतश्चैवं तदा चाहं नारायणीश्रि! सत्वरम् ॥ ३६॥ त्वया साकं त्वाजगाम देवगुरोर्गृहं दिवि । द्रागेवाऽदृश्यरूपोऽपि तदङ्गे मानसः सुतः ॥ ३७॥ इति श्रीलक्ष्मीनारायणीयसंहितायाः द्वापरयुगसन्तानात्मकस्य तृतीयखण्डे चतुर्थाध्यायान्तर्गतं देवैः कृतं पुरुषोत्तमस्तोत्रं सम्पूर्णम् । लक्ष्मीनारायणीयसंहिता । खण्ड ३। अध्याय ४/३०-३७॥ lakShmInArAyaNIyasaMhitA . khaNDa 3. adhyAya 4/30-37.. Proofread by PSA Easwaran