श्री देवनाथ प्रपत्तिः
श्रीः ।
श्रीमते रामानुजाय नमः ।
श्रीमद् वरवर मुनये नमः ।
श्रीमद् वानमहाचल गुरुभ्यो नमः ।
अथ श्रीदेवनाथ प्रपत्तिः ।
श्रीवरमङ्कामातुः दिव्यकटाक्ष प्रभावपरिपूर्णः ।
श्रीदेवनाथपाद पयोजयुग्मप्रपत्ति माकलये ॥ १॥
श्रीमत्पराङ्कुशमुनिर्द्रविडशृतीनां
द्रष्टा प्रपन्नकुलकूट विभास्वरो यौ ।
क्षेमङ्करौ त्रिजगतां शरणं गतस्तौ
श्रीदेवनाथ चरणौ शरणं प्रपद्ये ॥ २॥
अस्मन्महाकुलगुरुः शठकोपसूरिः
यद्भोग्यतातिशय विस्मृत भिन्नवेद्यः ।
श्रीपादुकापदमवाप्य विराजते तौ
श्रीदेवनाथ चरणौ शरणं प्रपद्ये ॥ ३॥
दैत्यापहार जलमग्नधरोधृतिं प्राक्
देवश्चकार धृतकोलतनुर्यदासौ ।
मेरुर्यदीयखुरकिङ्किणिवन्ननाद
तौ देवनाथ चरणौ शरणं प्रपद्ये ॥ ४॥
श्रीशो बलेः कुहकवामन भावजुष्टः
गत्वाध्वरं तमवनीसुवनीपकः सन् ।
याभ्यां भुवं दिवमपि क्रमते स्म पूर्वं
तौ देवनाथ चरणौ शरणं प्रपद्ये ॥ ५॥
यौ दण्डकामुनिजनानुजिघृक्षयैव
यात्वा तदाश्रमपदानि पुरापुनीताम् ।
आसाद्य वानगिरिमद्य च नः पुनीतः
तौ देवनाथ चरणौ शरणं प्रपद्ये ॥ ६॥
अम्बामनुदृतवतीमतिकोपनां यौ
अपाद्य विस्मयवशां निजचङ्क्रमेण ।
स्तब्धां वितेनतुरलं नवनीतचौर्ये
तौ देवनाथ चरणौ शरणं प्रपद्ये ॥ ७॥
यौ मानसेषु यमिनां कमलाशुभाङ्के
भातस्तथैव वरमूर्धनि चोर्ध्वपुम्साम् ।
वृन्दावने व्यहरतां भवने च गोप्याः
तौ देवनाथ चरणौ शरणं प्रपद्ये ॥ ८॥
दूत्यप्रसङ्गगमने हि पृथासुतार्थे
प्रेमान्धभावशगा वचलस्थलज्ञौ ।
यौ शम्सतो भगवतः श्रितवत्सलत्वं
तौ देवनाथ चरणौ शरणं प्रपद्ये ॥ ९॥
वज्रध्वजाङ्कुश सुधाकलशातपत्र
कल्पदृमाङ्किततलौ कमनीयशोभौ ।
देवीकरैरपि भयादुपमृद्यमानौ
देवाधिनाथ चरणौ शरणं प्रपद्ये ॥ १०॥
सायुज्यमाप्य यदपाश्रय पादुकाभ्यां
सर्वोत्तमङ्गधरणं भजते शठारिः ।
सर्वेष्टदौ हृदयवागतिगप्रभावौ
तौ देवनाथ चरणौ शरणं प्रपद्ये ॥ ११॥
यौ तस्थतुर्यतिपतेर्यवनापहारे
सम्सेविते भगवति दृतमङ्कमेत्य ।
सम्पत्सुतत्वमपि तस्य समादधातां
तौ देवनाथ चरणौ शरणं प्रपद्ये ॥ १२॥
श्रीरङ्गधामनि शठारि सहस्रगीतेः
श्रोतुं गुरोर्विवरणं रुचिरोपयन्तुः ।
गर्भालयाद्गरुडमण्डपमागतौ यौ
तौ देवनाथ चरणौ शरणं प्रपद्ये ॥ १३॥
श्रीवेङ्कटक्षितिराद्वरवल्लिमङ्कां
श्रीवानशैलमुनिना समुपाहृतां यौ ।
उद्वोढुमत्वरयुतां वरमाशुगत्या
तौ देवनाथ चरणौ शरणं प्रपद्ये ॥ १४॥
श्रीभूमिभानुविधुदेववधूयुगैश्च
श्रीमन्मृकण्डुसुत भार्गववैनतेयै ।
सेनाधिपतेन लसतः फणिनाथभोगे
वानाचलस्य चरणौ शरणं प्रपद्ये ॥ १५॥
सिम्हासने मणिमये कमलामहिभ्यां
देव्या जगज्जनिकया वरमङ्कया च ।
श्रीविष्णुचित्तसुतया च सम विभातः
देवाधिपस्य चरणौ शरणं प्रपद्ये ॥ १६॥
देवाधिनाथपदयोः गोपालार्यकृतामिमाम् ।
प्रपत्तिं पठतां नित्यं प्रसीदतु रमापतिः ॥
॥ इति श्रीदेवनाथप्रपत्तिः समाप्ता ॥