Dharmakritam Radhakrishna Stotram

 धर्मकृतं राधाकृष्णस्तोत्रम् 

धर्म उवाच ।
मातर्जानीहि मां धर्मं धर्मज्ञानां गुरोर्गुरुम् ।
परस्त्रीमातृबुद्धिं च कुर्वन्तं सन्ततं सति ॥ १९॥

अहं तवान्तर्विज्ञातुमागतस्तव सन्निधिम् ।
युष्माकं च मनो जाने तथापि दैवबोधितः ॥ २०॥

कृतं मे दमनं साध्वि न विरुद्धं यथोचितम् ।
शास्तिः समुत्पथस्थानामीश्वरेण विनिर्मिता ॥ २१॥

धर्मं स्वधर्मं विज्ञातुं कालं कलयितुं क्षमः ।
विधातारं संविधातुं तस्मै कृष्णाय ते नमः ॥ २२॥

संहर्तुं यः क्षमः काले संहर्तारं भवं विभुः ।
स्रष्टारं लीलया स्रष्टुं तस्मै कृष्णाय ते नमः ॥ २३॥

शत्रुं विधातुं मित्रं च सुप्रीतिं कलहं क्षमः ।
स्रष्टुं नष्टुं तदेवं च तस्मै कृष्णाय ते नमः ॥ २४॥

शापं प्रदातुं सर्वाश्च सुखदुःखवरान्क्षमः ।
सम्पदं विपदं यो हि तस्मै कृष्णाय ते नमः ॥ २५॥

प्रकृतिर्निर्मिता येन महाविष्णुश्च निर्मितः ।
ब्रह्मविष्णुमहेशाद्यास्तस्मै कृष्णाय ते नमः ॥ २६॥

येन शुक्लीकृतं क्षीरं जलं शीतं कृतं पुरा ।
दाहीकृतो हुताशश्च तस्मै कृष्णाय ते नमः ॥ २७॥

अतितेजः समुत्थाय तेजोरूपाय मूर्त्तये ।
गुणश्रेष्ठ निर्गुणाय तस्मै कृष्णाय ते नमः ॥ २८॥

सर्वस्मै सर्वबीजाय सर्वेषामन्तरात्मने ।
सर्वबन्धुस्वरूपाय तस्मै कृष्णाय ते नमः ॥ २९॥

इत्युक्त्वा पुरतस्तस्यास्तस्थौ धर्मो जगद्गुरुः ॥

इति श्रीब्रह्मवैवर्तपुराणे श्रीकृष्णजन्मखण्डे पूर्वे द्वात्रिंशाध्यायान्तर्गतं
         धर्मकृतं राधाकृष्णस्तोत्रं समाप्तम् ।

ब्रह्मवैवर्तपुराण । श्रीकृष्णजन्म, पूर्वभाग । अध्याय ४२/२२-२९॥


brahmavaivartapurANa . shrIkRRiShNajanma, pUrvabhAga . adhyAya 42/22-29..

Proofread by PSA Easwaran