Shri Dharmanandana Ashtakam

 श्रीधर्मनन्दनाष्टकम् 

मुक्तानां सदसि सदा विराजमानं
पूर्णेन्दु-प्रवरमुखाब्ज-पत्रनेत्रम् ।
मन्दार-स्थलरुह-कुन्दसारहारं
धर्माङ्ग-प्रभवमहं हरिं प्रपद्ये ॥ १॥

अभोज-ध्वजकलशां-कुशोर्ध्वेरेखा
गोपाद-प्रमुखसुलक्ष्म-पादपद्मम् ।
सामोद-भ्रमरविगुञ्जिता-वचूलं
धर्माङ्ग-प्रभवमहं हरिं प्रपद्ये ॥ २॥

भक्तेभ्यो विहितसबीज-साङ्ख्ययोगं
प्रावारप्रचलित-कञ्चुकाभिरामम् ।
श्रीखण्ड-प्रवर-तमालपत्र-मीशं
धर्माङ्ग-प्रभवमहं हरिं प्रपद्ये ॥ ३॥

विद्योतन्मणिमय-हेमकुण्डल-श्री-
कर्णाग्रोत्तम-कुसुमा-वतंसरम्यम् ।
श्रीवत्सोल्लसित-भुजान्तरं सदीशं
धर्माङ्ग-प्रभवमहं हरिं प्रपद्ये ॥ ४॥

संसार-प्रशमन-कारण-प्रतापं
बिभ्राणं सुरुचिर मौक्तिकीञ्च मालाम् ।
हस्ताग्रे सुललित-मालिकां दधानं
धर्माङ्ग-प्रभवमहं हरिं प्रपद्ये ॥ ५॥

शान्तानां विदलित-मानमत्सराणां
कामादिप्रबल-विपक्षनिर्जयानाम् ।
साधूना-मनिश-मवेक्षणीय-रूपं
धर्माङ्ग-प्रभवमहं हरिं प्रपद्ये ॥ ६॥

वेदान्तै-रुदित-सुकीर्ति-माप्तकामं
जुष्टाङ्घ्रिं विजितविदूषणैर्मुनिन्द्रैः ।
ब्रह्माण्ड-स्थपति-सुरेश्वरैकनाथं
धर्माङ्ग-प्रभवमहं हरिं प्रपद्ये ॥ ७॥

रम्याणां विमल-सुवर्णभूषणानां
श्रीमत्तामवयव-शोभाया दधानम् ।
घर्मान्त-प्रभाव-नवीन-मेघनीलं
धर्माङ्ग-प्रभवमहं हरिं प्रपद्ये ॥ ८॥

इति श्री अचिन्त्यानन्दब्रह्मचारीविरचितं श्रीधर्मनन्दनाष्टकं सम्पूर्णम् ।