श्रीधर्मनन्दनस्तोत्रम्
(हरिगीत छन्द)
सितसान्द्र-सद्वसनालिनं वरमाल्यमञ्जुलमालिनं
चलितालिनं पृथुमालिनं नवपुष्पभूषणशालिनम् ।
वृषपालिनं श्रितलालिनं जपमालिका-परिचालिनं
प्रणमामि धर्मसुतं हरिं शुभकारि-सद्गुणमालिनम् ॥ १॥
मलजालभृत्-कलिकण्डनं जनमित्र-सज्जनमण्डनं
स्मरतण्डनं मदभण्डनं कृतदुष्टमानव-दण्डनम् ।
जित-चण्डनं स्मयकण्डनं कृतभूरि-दुर्मतखण्डनं
प्रणमामि धर्मसुतं हरिं शुभकारि-सद्गुणमालिनम् ॥ २॥
वृषवैरि-दर्पविदारिणं श्रितजात-संसृतिहारिणं
अवतारणं शुभकारिणं मणिहेम-भूषणधारिणम् ।
जनभन्दनं मुनिवन्दनं परिचर्चितोत्तमचन्दनं
प्रणमामि धर्मसुतं हरिं शुभकारि-सद्गुणमालिनम् ॥ ३॥
जितदोषणं श्रिततोषणं कृतधर्मवंश-विपोषणं
क्षतरोषणं श्रुतजोषणं निजभक्त-मानसपोषणम् ।
जनबोधनं मतिशोधनं प्रियनम्र-शान्त-तपोधनं
प्रणमामि धर्मसुतं हरिं शुभकारि-सद्गुणमालिनम् ॥ ४॥
हृतभक्ति-मज्जनवासनं शतकोटिभास्करभासनं
जनशासनं गरुडासनं स्वनुरक्तभक्त-सभासनम् ।
हृतशोचनं घनरोचनं कृतबद्धजीव-विमोचनं
प्रणमामि धर्मसुतं हरिं शुभकारि-सद्गुणमालिनम् ॥ ५॥
भुवनोद्भवादिविधायिनं भवहारि-सद्गुणनायिनं
अनपायिनिं सुखदायिनं हितकारि-सज्जनयायिनम् ।
जनपावनं स्वजनावनं शुभधर्मभक्ति-विभावनं
प्रणमामि धर्मसुतं हरिं शुभकारि-सद्गुणमालिनम् ॥ ६॥
निजभक्त-पद्मविकाशिनं दुरतिक्रमार्ति-विनाशिनं
स्वविलासिनं मतिदाशिनं प्रियदम्भहीन-निराशिनम् ।
क्षतखेदनं शुभवेदनं यमदूत-भीतिविभेदनं
प्रणमामि धर्मसुतं हरिं शुभकारि-सद्गुणमालिनम् ॥ ७॥
असुरांश-देशिकगञ्जनं श्रितवृन्द-मानस-मञ्जनं
निजरञ्जनं भवभञ्जनं गुणनीरराशि-निरञ्जनम् ।
मुनिमाननं प्रियकाननं नवपद्मचन्द्र-वराननं
प्रणमामि धर्मसुतं हरिं शुभकारि-सद्गुणमालिनम् ॥ ८॥
नृपदेवमुक्त-सभाजितं श्रुतिशास्त्रवेदि-सभाजितं
सकलाजितं सुजनाजितं गुणभाजिवाजि-निराजितम् ।
श्रितनोदनं मुनिमोदनं दलितक्षमा-खिलतोदनं
प्रणमामि धर्मसुतं हरिं शुभकारि-सद्गुणमालिनम् ॥ ९॥
श्री अचिन्त्यानन्दब्रह्मचारीविरचितं श्रीधर्मनन्दनस्तोत्रं सम्पूर्णम् ।