Dharmarajakritam Purushottama Stotram

धर्मराजकृतं पुरुषोत्तमस्तोत्रम् २

धर्मराज उवाच । नमस्ते भगवन्देव लोकनाथ जगत्पते । क्षीरोदवासिनं देवं शेषभोगानुशायिनम् ॥ ६०॥ वरं वरेण्यं वरदं कर्तारमकृतं प्रभुम् । विश्वेश्वरमजं विष्णुं सर्वज्ञमपराजितम् ॥ ६१॥ नीलोत्पलदलश्यामं पुण्डरीकनिभेक्षणम् । सर्वज्ञं निर्गुणं शान्तं जगद्धातारमव्ययम् ॥ ६२॥ सर्वलोकविधातारं सर्वलोकसुखावहम् । पुराणं वुरुषं वेद्यं व्यक्ताव्यक्तं सनातनम् ॥ ६३॥ परावराणां स्रष्टारं लोकनाथं जगद्गुरुम् । श्रीवत्सोरस्कसंयुक्तं वनमालाविभूषितम् ॥ ६४॥ पीतवस्त्रं चतुर्बाहुं शङ्खचक्रगदाधरम् । हारकेयूरसंयुक्तं मुकुटाङ्गदधारिणम् ॥ ६५॥ सर्वलक्षणसम्पूर्णं सर्वेन्द्रियविवर्जितम् । कूटस्तमचलं सूक्ष्मं ज्योतीरूपं सनातनम् ॥ ६६॥ भावाभावविनिर्मुक्तं व्यापिनं प्रकृतेः परम् । नमस्यामि जगन्नाथमीश्वरं सुखदं प्रभुम् ॥ ६७॥ इति ब्रह्मपुराणे पञ्चाशीतितमाध्यायान्तर्गतं धर्मराजकृतं पुरुषोत्तमस्तोत्रं समाप्तम् । ब्रह्मपुराण । अध्याय ४५/६०-६७॥ brahmapurANa . adhyAya 45/60-67.. Proofread by PSA Easwaran