Divyapati Ashtakam

 दिव्यपत्यष्टकम् 

(अष्टपदी)
जलधर-सुन्दर मदन-मनोहर
हृदय-तमोहर कृष्ण हरे ।
वृषकुल-भूषण दलितविदूषण
दिव्य-विभूषण दिव्यगते ।
जयजय-जयकर दीनदयाकर
जगति दिवाकर दिव्यपते ॥ १॥

निजजनरञ्जन भवभयभञ्जन
भुवननिरञ्जन भक्तरते ।
मुनिजन-मण्डन विषय-विखण्डन
खलजन-दण्डन दण्डविधे ।
जयजय-जयकर दीनदयाकर
जगति दिवाकर दिव्यपते ॥ २॥

असुर-निकन्दन सुरवृष-नन्दन
चर्चित-चन्दन मुक्तमुने ।
भवजलतारण दोष-निवारण
मङ्गल-कारण मुक्तपते ।
जयजय-जयकर दीनदयाकर
जगति दिवाकर दिव्यपते ॥ ३॥

सरसिज-लोचन जनिमृति-मोचन
रविशशि-रोचन रागिरते ।
असुर-विमोहन सुरसुख-दोहन
वारण-रोहण शीघ्रगते ।
जयजय-जयकर दीनदयाकर
जगति दिवाकर दिव्यपते ॥ ४॥

निजहित-शासन शाप-विनाशन
हय-गरुडासन सादिवृते ।
दुर्गपुरासन भक्त-निवासन
भूजित-कुवासन भक्तरते ।
जयजय-जयकर दीनदयाकर
जगति दिवाकर दिव्यपते ॥ ५॥

रचित-निजावन भक्ति-विभावन
पङ्क्ति-सुपावन पुण्यपते ।
शं कुरु शङ्कर वैरिभयङ्कर
धर्मधुरन्धर योगिगते ।
जयजय-जयकर दीनदयाकर
जगति दिवाकर दिव्यपते ॥ ६॥

खण्डित-चण्डं पण्डित-मण्डं
जित-पाखण्डं दण्ड-भटम् ।
कम्पिति-कालं वृषकुल-पालं
वर-वनमालं पीतपटम् ।
जयजय-जयकर दीनदयाकर
जगति दिवाकर दिव्यपते ॥ ७॥

श्रितसुखकन्दं बोधितमन्दं
सहजानन्दं त्वाधिभजे ।
कुरु तव दासं चरणनिवासं
त्यक्तकुवासं योगमुनिम् ।
जयजय-जयकर दीनदयाकर
जगति दिवाकर दिव्यपते ॥ ८॥

इति श्रीयोगानन्दमुनिविरचितं दिव्यपत्यष्टकं  सम्पूर्णम् ।