Galavakritam 1 Vishnu Stotram

गालवकृतं १ विष्णुस्तोत्रम्

गालव उवाच । नमो देवादिदेवाय शङ्खचक्रगदाभृते । नमो नित्याय शुद्धाय सच्चिदानन्दरूपिणे ॥ ३१॥ नमो भक्तार्तिहन्त्रे ते हव्यकव्यस्वरूपिणे । नमस्त्रिमूर्तये तुभ्यं सृष्टिस्थित्यन्तकारिणे ॥ ३२॥ नमः परेशाय नमो विभूम्ने नमोऽस्तु लक्ष्मीपतये विधात्रे । नमोऽस्तु सूर्येन्दुविलोचनाय नमो विरिञ्च्याद्यभिवन्दिताय ॥ ३३॥ यो नामजात्यादिविकल्पहीनः समस्तदोषैरपि वर्जितो यः । समस्तसंसारभयापहारिणे तस्मै नमो दैत्यविनाशनाय ॥ ३४॥ वेदान्तवेद्याय रमेश्वराय वैकुण्ठवासाय विधातृपित्रे । नमो नमः सत्यजनार्तिहारिणे नारायणायामितविक्रमाय ॥ ३५॥ नमस्तुभ्यं भगवते वासुदेवाय शार्ङ्गिणे । भूयो भूयो नमस्तुभ्यं शेषपर्यङ्कशायिने ॥ ३६॥ इति श्रीस्कन्दपुराणे ब्रह्मखण्डे सेतुखण्डे तृतीयाध्यायान्तर्गतं गालवकृतं विष्णुस्तोत्रं समाप्तम् । स्कन्दपुराण । ब्राह्मखण्ड । सेतुखण्ड । अध्याय ३/३१-३६॥ skandapurANa . brAhmakhaNDa . setukhaNDa . adhyAya 3/31-36.. Proofread by PSA Easwaran