Gauramukhamunikritam Shri Krishnanarayana Stotram

गौरमुखमुनिकृतं श्रीकृष्णनारायणस्तोत्रम्

नमस्ते श्रीकृष्णनारायणायाक्षरधामिने । नमस्ते चाद्यरूपाय वीणाधृक् द्विभुजाय च ॥ २६॥ शङ्खचक्रान्वितलक्ष्मीपतयेऽर्थधृगे नमः । सर्वप्रदाय दिव्याय भक्तगोप्त्रे च ते नमः ॥ २७॥ पञ्चभूतस्थितायाऽत्र हृदयस्थाय ते नमः । आपूरकाय सर्वेषामक्षयाय च ते नमः ॥ २८॥ ब्रह्मव्रतधरायाऽब्धौ शेषस्थाय च ते नमः । त्वत्तो भूतमिदं सर्वं सर्वदात्रे च ते नमः ॥ २९॥ त्वत्तो यज्ञस्तथा हव्यं कव्यं भोज्यं च वारि च । सर्वं चास्ति शरीरं ते तस्मै भोज्यं प्रदेहि वै ॥ ३०॥ ममाऽत्र श्रीकृष्णनारायण राजा हि दुर्जयः । आगतोऽभ्यागतस्तस्य चातिथ्यं कुरु माधव ॥ ३१॥ अहं च तव दासोऽस्मि कुरुष्वन्नादिसञ्चयम् । यं यं स्पृशामि हस्तेन यं च पश्यामि चक्षुषा ॥ ३२॥ काष्ठं वा तृणकन्दं वा तत्तदन्नं चतुर्विधम् । तथा पेयं जलं मिष्टं दुग्धं दधि घृतादिकम् ॥ ३३॥ तत्सर्वं सिद्ध्यतां मह्यं यद्ध्यातं मनसा मया । तवैव तु प्रतापेन भवेदातिथ्यमच्युत ॥ ३४॥ इति श्रीलक्ष्मीनारायणीयसंहितायां प्रथमे कृतयुगसन्ताने ५३२-अध्यायान्तर्गतं गौरमुखमुनिकृतं श्रीकृष्णनारायणस्तोत्रं सम्पूर्णम् । लक्ष्मीनारायणीयसंहिता । खण्ड १। अध्याय ५३२/२६-३४॥ lakShmInArAyaNIyasaMhitA . khaNDa 1. adhyAya 532/26-34.. Proofread by PSA Easwaran