Gopabalaih Kritam Shri Krishnarama Stotram

गोपबालैः कृतं श्रीकृष्णरामस्तोत्रम्

अवरुह्य तरुभ्यश्च बालका बलशालिनः । फलान्यादाय गच्छन्तो ददृशुर्दैत्यपुङ्गवम् ॥ १८॥ महाबलं महाकायं घोरं गर्दभरूपिणम् । आगच्छन्तं महावेगात्कुर्वन्तं शब्दमुल्बणम् ॥ १९॥ तं दृष्ट्वा रुरुदुः सर्वे फलानि तत्यजुर्भिया । कृष्णकृष्णेति शब्दं च प्रचक्रुर्बहुधा भृशम् ॥ २०॥ (गोपबाला ऊचुः ।) अस्मान् रक्ष समागच्छ हे कृष्ण करुणानिधे । हे सङ्कर्षण नो रक्ष प्राणा नो यान्ति दानवात् ॥ २१॥ हे कृष्ण हे कृष्ण हरे मुरारे गोविन्द दामोदर दीनबन्धो । गोपीश गोपेश भवार्णवेऽस्माननन्त नारायण रक्ष रक्ष ॥ २२॥ भयेऽभये वाथ शुभेऽशुभे वा सुखेषु दुःखेषु च दीननाथ । त्वया विनाऽन्यं शरणं भवार्णवे न नोऽस्ति हे माधव रक्ष रक्ष ॥ २३॥ जय जय गुणसिन्धो कृष्ण भक्तैकबन्धो बहुतरभययुक्तान्बालकान् रक्ष रक्ष । जहि दनुजकुलानामीशमस्माकमन्तं सुरकुलबलदर्पं वर्धयेमं निहत्य ॥ २४॥ इति ब्रह्मवैवर्तपुराणे श्रीकृष्णजन्मखण्डे द्वाविंशाध्यायान्तर्गतं गोपबालैः धेनुकासुरात् रक्षार्थं कृतं श्रीकृष्ण-रामस्तोत्रं सम्पूर्णम् । ब्रह्मवैवर्तपुराण । श्रीकृष्णजन्म, पूर्वभाग । अध्याय २२/२२-२४॥ brahmavaivartapurANa . shrIkRRiShNajanma, pUrvabhAga . adhyAya 22/22-24.. Proofread by PSA Easwaran